Izraeli paralajmëroi sot se do të intensifikojë sulmet e tij në Gazë nëse Hamasi vazhdon të lëshojë raketa, pasi ekipet palestineze të shpëtimit raportuan dhjetëra të vdekur nga sulmet izraelite në ditën e parë të Vitit të Ri.
Gjatë javës së kaluar, militantët palestinezë kanë sulmuar vazhdimisht me raketa ndaj Izraelit, veçanërisht nga Gaza veriore, ku ushtria izraelite po kryen një ofensivë të madhe.
Raketat nuk kanë shkaktuar dëme të mëdha – por ato kanë qenë një goditje politike për qeverinë izraelite – pas gati 15 muajsh luftime.
“Dua të dërgoj një mesazh të qartë për krerët e terroristëve në Gazë: nëse Hamasi nuk lejon shpejt lirimin e pengjeve izraelite nga Gaza… dhe vazhdon të sulmojë ndaj komuniteteve izraelite, do të përballet me goditje të një intensiteti të paparë në Gazë për një kohë të gjatë”, tha ministri i Mbrojtjes, Israel Katz.
Paralajmërimi i tij erdhi pas një vizite në qytetin izraelit Netivot, i cili kohët e fundit u vu nën shënjestrën e raketave nga Gaza.
Militantët palestinezë po mbajnë ende 96 pengje të kapur gjatë sulmit të tyre të 7 tetorit 2023 ndaj Izraelit dhe raundet pasuese të negociatave për lirimin e tyre dhe një armëpushim kanë dështuar të gjitha.
Sulmet izraelite kanë vazhduar sot në të gjithë Gazën.
“Bota e priti Vitin e Ri me festime, ndërsa ne pamë se viti 2025 filloi me masakrën e parë izraelite në qytetin e Jabalia pas mesnatës”, tha zëdhënësi i agjencisë së mbrojtjes civile, Mahmud Bassal.
“Pesëmbëdhjetë persona u vranë dhe më shumë se 20 të tjerë u plagosën gjate sulmit izraelit në një shtëpi ku jetonin njerëzit e zhvendosur”, tha ai.
Ushtria izraelite, kur u kontaktua, tha se po shqyrtonte sulmin e raportuar.
