Izraeli është në gjendje gatishmërie maksimale nga frika e sulmeve iraniane pas vrasjes së komandantit të Pasdaranit Mohamad Reza Zahedi, gjatë një sulmi në Damask, ndërsa presidenti i SHBA Joe Biden kritikoi Benyamin Netanjahun në një telefonatë të gjatë dhe “të tensionuar”, në të cilën ai urdhëroi kryeministri izraelit të ndryshojë menjëherë dhe rrënjësisht tonin e luftës në Gaza.
Vrasja nga ushtria izraelite e 7 vullnetarëve të World Central Kitchen ditët e fundit solli reagimin e liderit amerikan, i cili për 45 minuta sqaroi “nevojën që Izraeli të shpallë dhe zbatojë një sërë veprimesh specifike, konkrete dhe hapa të matshëm për të adresuar dëmtimin e civilëve dhe sigurinë e punonjësve humanitarë” në Rrip.
Në bisedën telefonike me kryeministrin izraelit, presidenti amerikan “theksoi se një armëpushim i menjëhershëm është thelbësor për të stabilizuar dhe përmirësuar situatën humanitare dhe për të mbrojtur civilët e pafajshëm, dhe i kërkoi kryeministrit të fuqizojë negociatorët e tij për të përfunduar pa vonesë marrëveshjen dhe për të sjellë pengjet në shtëpi në Rripin e Gazës”. Këtë e ka bërë të ditur Shtëpia e Bardhë.
Në bisedën e tyre telefonike, Biden dhe Netanyahu “diskutuan gjithashtu kërcënimet publike iraniane kundër Izraelit dhe popullit izraelit dhe presidenti i SHBA e bëri të qartë se Shtetet e Bashkuara mbështesin fuqishëm Izraelin përballë kërcënimeve të tilla”.
“Politika e Shteteve të Bashkuara do të përcaktohet nga vlerësimi ynë i veprimit të menjëhershëm të Izraelit në këto hapa,” tha Shtëpia e Bardhë, duke e bërë të qartë, sipas zëdhënësit të sigurisë kombëtare John Kirby, “zhgënjimin në rritje” të Biden me Netanjahun.
“Ne duam të shohim ndryshime reale brenda disa orëve, ditëve, si një rritje e madhe e ndihmave humanitare dhe reduktim i dhunës ndaj civilëve dhe punonjësve të ndihmës, ne duam jo vetëm njoftime, por ekzekutim dhe zbatim të masave”, paralajmëroi Kirby.
Në të njëjtën kohë, kreu i Shtëpisë së Bardhë shprehu “mbështetjen e palëkundur” të Amerikës për Izraelin përballë kërcënimeve nga Irani që po tronditin shtetin hebre.
/a.r
