Dhjetëra persona kanë humbur jetën si pasojë e një vale intensive sulmesh izraelite në të gjithë Libanin jugor dhe lindor. Sulmet erdhën fill pasi kryeministri izraelit Benjamin Netanyahu u zotua për përshkallëzimin e veprimeve ushtarake kundër Hezbollahut.
“Të paktën 31 persona u vranë në sulmet e fundit, përfshirë disa fëmijë”, tha ministria e shëndetësisë e Libanit.
Ushtria izraelite pretendon se ka goditur më shumë se 100 vende infrastrukturore dhe luftëtarë të Hezbollahut në atë që ishte një nga netët më të rënda të bombardimeve që nga fillimi i një armëpushimi të ndërmjetësuar nga SHBA-të në mesin e prillit.
Ushtria izraelite në një deklaratë për mediat bëri me dije se mëngjesin e kësaj të mërkure (27 maj) një predhë u lëshua nga Librani në Izrael, duke rënë në zonë të hapur. Ushtria sqaron se nuk është raportuar për persona të lënduar.
Duke folur në një takim të kabinetit të sigurisë të martën, Netanyahu tha se Izraeli po “thellonte operacionin në Liban”.
“IDF [Forcat Mbrojtëse të Izraelit] po operojnë me forca të mëdha në terren dhe po pushtojnë terrenin dominues”, tha ai, duke shtuar se ata po “forcojnë zonën e sigurisë” për të mbrojtur komunitetet në Izraelin verior nga sulmet e Hezbollahut.
Armëpushimi është shkelur vazhdimisht nga të dyja palët, duke kërcënuar të prishë bisedimet komplekse që po zhvillohen për t’i dhënë fund luftës midis SHBA-së, Izraelit dhe Iranit.
Sulmet ajrore dhe të artilerisë izraelite kanë vazhduar çdo ditë, veçanërisht në jug të Libanit, ndërsa Hezbollahu ka lëshuar raketa dhe dronë në komunitetet në Izraelin verior dhe trupat izraelite kanë pushtuar pjesë të Libanit jugor.
Sulmet ajrore shënjestruan fshatin Mashghara të Luginës Bekaa dhe Burj al-Shamali në të gjithë Libanin jugor.
Disa sulme ndodhën pranë Kështjellës Beaufort, një fortesë gati 900-vjeçare e njohur nga organi i trashëgimisë kulturore i OKB-së, UNESCO, si “një nga shembujt më të ruajtur të kështjellave mesjetare” në rajon.
