Ashtu siç edhe u paralajmërua më herët gjatë ditës, ish-truproja e Sali Berishës, Izet Haxhia ka mbërritur në Shqipëri.
Ai u ekstradua nga Turqia ku strehohej prej vitesh ndërkohë avioni që e solli në atdhe zbriti në Rinas në orën 20:07 minuta.
Për shoqërimin e tij nga aeroporti policia mori masa të rrepta sigurie. Aksi rrugor nga Rinasi deri në ambjentet e policisë paraprakisht ishte blinduar nga patrulla të shumta.
Ai do të qëndrojë fillimisht në ambjentet e Drejtorisë së Policisë së Tiranës dhe brenda 48-orësh, kur ai të dalë para gjykatës pritet të zhvendoset në ambjentet e burgut 313 ose 302 në Tiranë.
Në muajin prill, ai u vetëdorëzua në policinë turke dhe lajmin e bëri vetë të ditur përmes rrjeteve sociale.
Izet Haxhia është dënuar nga gjykata shqiptare me 25 vjet burg për vrasjen e Azem Hajdarit, akuzë të cilën ai nuk e ka pranuar kurrë.
Ai ka deklaruar se vjen në Shqipëri me idenë për rihapjen e dosjes, megjithatë nuk dihet nëse gjykata do ta marrë parasysh kërkesën e tij.
a.ç
