Iu turr Ballës me rrip, hidrocentralet që mori deputeti i PD Petrit Doda nga Berisha në Lurë, si i ka kamufluar në emrin e familjarëve

Në Kuvend u shënua tentativa e radhës për përplasje fizike mes opozitës dhe mazhorancës. Protagonist i yryshit nuk ishte si gjithmonë vetëm Flamur Noka, me dosje në SPAK, por edhe deputeti tjetër i Partisë Demokratike, Petrit Doda. Teksa ministri Taulan Balla kishte fjalën për të folur për Diasporën dhe zgjedhjet e 11 Majit, deputeti Doda hoqi rripin e pantallonave dhe u sul drejt foltores, për të goditur Ballën.

Në këtë moment ndërhyri Garda. Deputeti Petrit Doda tentoi disa herë të godiste ministrin me një mikrofon nga distanca e afërt. Shfaqje të tilla agresive janë të kuptueshme gjatë kësaj kohe kur Sali Berisha po i jep dorën e fundit listës së kandidatëve për deputetë. Petrit Doda hyri në Kuvend në janar të vitit 2023, duke u ulur në karrigen e Alfred Rushajt, i cili dha dorëheqjen në nëntor të vitit 2022.

Nga viti 2013 deri në vitin 2020, Petrit Doda, përmes bashkëshortes së tij Hane Doda me kompaninë Crom Albania, ka arritur të blejë hidrocentralin e Selishtës për 760 mijë euro, ndërkohë që vetëm vlera e investimit për ndërtimin dhe vënien në punë të HEC është 1.2 milionë euro. Madje 49 % të aksioneve të kompanisë së hidrocentralit i ka blerë për 32 mijë euro.

Ky fakt krijon dyshime të forta për një blerje fiktive. Leja për ndërtimin e hidrocentralit të Selishtës është miratuar nga Genc Ruli, ministri i Berishës në vitin 2008.

Petrit Doda është themelues i kompanisë Crom Albania për shitjen e metaleve si çelik, hekur, bronz, bakër, alumin, lëndë të para, pllaka dhe pajisje hidraulike etj. Në vitin 2007 kompaninë e kalon në emrin e Ardit Dumës dhe në vitin 2008 kompania kalon në emrin e bashkëshortes së Petrit Dodës, Hane Doda.

Përmes kësaj kompanie, Petrit Doda ka gjenereuar qindra mijëra euro të ardhura, gjithnjë në emër të familjarëve të tij.

Pak para se të largohen nga pushteti, Sali Berisha i ka dhënë Petrit Dodës edhe një tjetër hidrocentral me vendodhje në rrjedhën e poshtme të lumit Molla e Lurës, përmes kompanisë GJURR REÇ dhe një karteli kompanish të tjera. Edhe këtë pasuri publike, Petrit Doda e ka kamufluar në emrin e djemve të tij, Elton dhe Edison Doda.

Fillimisht hidrocentrali është përfituar përmes kompanisë Marsian Service. Kompania është themeluar si një agjenci doganore pikërisht nga Petrit Doda.

Kompaninë më pas e ka kaluar në emrin e famijarëve të tij, për shkak të ambicieve për t’ju futur politikës. Mbetet për të bërë verifikime më të hollsishme se si kjo pasuri është deklaruar dhe justifikuar në ILDKPKI nga deputeti Petrit Doda./ Prapaskena