Gjykata Brukselit shpalli 119 dënime të martën për procesin “Encro”, një nga rastet më të mëdha të trafikut të narkotikëve në historinë e Belgjikës, me dënime që variojnë deri në 17 vjet burg dhe konfiskime masive. Pas një procesi që zgjati 16 muaj, 115 individë dhe katër kompani u shpallën fajtorë për akuza që përfshijnë pjesëmarrjen në një organizatë kriminale, trafikimin e narkotikëve dhe armëve, si dhe përpjekjet për shantazh dhe rrëmbim.
Në mesin e të dënuarve, të kombësive të ndryshme ka edhe shtetas shqiptarë dhe kosovarë, përveç se kolumbianë, belgë, ukrainas apo nga Afrika e veriut. Njëri prej tyre, shqiptari Eridan Guerrero Munoz, i cili u dënua për drejtimin e laboratorëve të kokainës në Belgjikë, bë i famshëm në mediat belge me deklaratën e tij “Luajta dhe humba”.
Hetimi i quajtur “Encro” u bazua në deshifrimin e komunikimeve të koduara në EncroChat dhe Sky ECC, që çoi në zbardhjen e aktiviteteve të një organizate të gjerë kriminale. Gjithsej, u dhanë rreth 700 vite burg, ndërsa konfiskimet e urdhëruara arrijnë në 65 milionë euro. Këto konfiskime përfshijnë pasuri të paluajtshme të investuara nga të ardhurat nga trafikimi i drogës.
Prokuroria kërkoi arrestimin e menjëhershëm për 58 persona, duke konsideruar rrezikun e arratisjes ose përsëritjes së krimit nga të dënuarit. Gjykata pranoi 49 nga këto kërkesa për arrestime të menjëhershme.
Ky vendim thekson seriozitetin e këtij rasti, që mbetet një nga çështjet më të mëdha në historinë gjyqësore të Belgjikës, duke ngritur sfida për rikuperimin e fondeve nga pasuritë e investuara jashtë vendit në bashkëpunim me autoritetet ndërkombëtare.
/a.r
