Autori i fotos që u bë e njohur në rrjetet sociale, atë të Nënë Zylës duke marrë një gjobë nga policët e bashkisë në Tiranë, është një italian, i quajtur Francesco Acone, shkruan NewsBomb.
Acone, cili prej kohësh jeton në Tiranë, ka treguar se momenti i shkrepjes së kësaj fotoje ka qenë rastësi.
“Nuk e prisja dhe jam i sigurt që edhe vetë nëna nuk do e donte gjithë këtë publicitet. Lexova rrëfimin e saj, shumë realist, një histori më vete. Fotografia është realizuar te “Mysmyl Shyri”, në një pallat, kur unë isha duke shkuar në shtëpi. Unë shikoj shpesh të tilla situata. Një polic që vendos gjoba, ata që shesin rrugës pa licencë, por zakonisht është gjithmonë debat, njerëz që afrohen nga kurioziteti për të parë çfarë ndodh. Këto situata nuk më pëlqejnë t’i fotografoj, pasi është një lloji mungese etike. Një nënë debaton… ti hyn aty, është pak e bezdisshme. Ndërsa kjo situatë ishte krejt ndryshe. Heshtje totale. Nëna nuk ishte duke folur, polici nuk ishte duke folur, ai burri gjithashtu. Njerëzit ishin duke kaluar në punën e tyre dhe në një moment unë isha dëshmitar dhe thosha: e vërtetë është apo jo? Vetëm unë po e shikoja atë situatë? Nxora telefonin ta fotografoja. Nëna ishte me kokën ulur, polici ishte në gjunjë duke shkruar dhe në momentin që unë e shkrepa ajo ngriti kokën e pashqetësuar që po e fotografoja, por me atë shikim të ashpër e komunikues në të njëjtën kohë. Si një Madonna (Shën Maria)… e trishtuar, por komunikuese për çfarë po ndodhte. Ishte një pikturë. Polici ishte poshtë, në gjunjë. Si një shenjë respekti”, ka treguar fotografi italian për Newsbomb.
