Një shtetas italian rezulton i humbur në Shqipëri që prej qershorit të vitit 2013. Denoncimi është bërë nga e motra e tij Barbara e cila ka deklaruar për televizionin italian “TGCOM”, se Ivan Angelo, 43 vjeç, ka dy vjet që nuk bëhet i gjallë.
Ajo tha se vëllai i saj ka shkuar në Shqipëri që në qershor të vitit 2013, pasi njohu në internet një shqiptare me emrin Alba. Siç trergon e motra e italianit, Ivani dhe shqiptarja flisnin shpesh në “Skype”, deri sa vendosën që të takoheshin në Tiranë, në prill të vitit 2013.
Madje Ivani u njoh edhe me prindërit e vajzës ku më pas vendosën që të martoheshin. Por me rikthimin e tij në qershor në Tiranë, Ivani humbi gjurmët. Motra e tij dyshon se Ivani ka zbuluar se bëhet fjalë për falsifikim dokumentesh dhe se Alba nuk ishte ajo që hiqej. Madje tashmë 43-vjeçari italian prej dy vitresh as nuk përgjigjet në telefon, në email apo në rrjetet sociale.
Dhe kjo e ka bërë mjaft dyeshese Barbaran pasi në ditët e para të tij nga mbërritja në Shëipëri, Ivani e telefononte shpesh. Ai madje i kishte treguar për një zënkë me Albën në një nga baret e Tiranës. Barbara në rrëfimin e saj tregon se nga i vëllai i është dorëzuar një çantë udhëtimi, ku ishte dhe laptopi i tij, por pa harddisk.
“Nga autoritetet shqiptare një vit pas zhdukjes na u tha se Ivani kishte dalë nga Shqipëria përmes portit të Durrësit për në Bari. Por të dhënat në dokumente ishin të paplota dhe kishte mospërputhje. Në tetor shkova në Tiranë dhe takova Ministrin e Brendshëm, Saimir Tahirin, i cili më shoqëroi në Drejtorinë e Përgjithshme të Policisë dhe në Drejtorinë e Krimeve për të bërë denoncim, aty më thanë se nuk e njihnin rastin, por më premtuan se do nisnin hetimet”, thotë motra e Ivanit.
