Kombëtarja shqiptare e futbollit do të luajë në mars në Itali ndeshjen e radhës të kualifikueseve të Botërorit 2018. Por nëse pritni një atmosferë të ngjashme si ajo në miqësoren e luajtur në nëntorin e vitit 2014 në Genoa, do të zhgënjeheni, pasi Federata Italiane (FIGC), po ndërton një strategji të mirëfilltë për të evituar praninë e shumtë në numër të tifozëve shqiptarë.
Sipas “La Gazzeta Dello Sport”, FIGC do të zgjedhë mes tre stadiumeve për zhvillimin e ndeshjes së 24 marsit: “Renzo Barbera” të Palermos, “Stadio Friuli” të Udines dhe “Mapei Stadium-Citta del Tricolore” të Rexhio Emilias, shkruan Panorama Sport.
Ajo që bie në sy është fakti se të tre këto stadiume kanë një kapacitet shumë të vogël spektatorësh.
Duke njohur interesimin e madh për ndeshjen e marsit, ky veprim i FIGC mund të duket i çuditshëm, pasi tifozët do të kishin mbushur edhe stadiumet më të mëdha italiane si “Olimpico” apo “San Siro”.
Por kjo është një strategji e qartë e Federatës Italiane për të kufizuar praninë e tifozëve kuqezi në stadium dhe për të mos e kthyer këtë në një ndeshje “në shtëpi” për Shqipërinë. /a.m.
