Italia do të dërgojë sa më shpejt 450 ushtarë për të mbrojtur digën e Mosulit në veri të Irakut, pranë qytetit të pushtuar nga ISIS, me qëllim për të mbrojtur këtë kantier, për të cilën një ndërmarrje italiane ka fituar një tender, njoftoi kryeministri, Matteo Renzi.
“Tenderi për konsolidimin e digës u fitua nga një shoqëri italiane dhe do të dërgojmë në vend 450 trupa për të ndihmuar në mbrojtje”, konfirmoi sot kryeministri në “Porta a Porta”, një emision televiziv.
Qyteti i dytë i Irakut, Mosuli është pushtuar që prej qershorit 2014 nga xhihadistët e Shtetit Islamik.
“Diga ndodhet në qendër të një zone të rrezikshme, në kufi me Shtetin Islamik, është dëmtuar dhe rrezikon të shkatërrohet”, shtoi Mateo Renzi.
Forcat kurde të mbështetura nga aviacioni amerikan, kishin rimarrë digën strategjike nga duart e Shtetit Islamik në gusht të vitit 2014. Diga e Mosulit është më e rëndësishmja në Irak, pasi furnizon me energji më shumë se një milionë persona në veri të vendit.
ATSH
