Policia italiane ka zbuluar një laborator droge ditën e djeshme në periferi të qytetit të Padovës. Lajmi bëhet i ditur nga mediat italiane sipas të cilave, laboratori i drogës u zbulua pak ditë pas arrestimit të një shqiptari me rreth gjysmë kilogram heroinë. Dhe siç nënvizojnë mediat italiane, shqiptari ishte pjesë e këtij grupi.
Brenda banesës ku përpunohej droga u gjetën 11 kg heroinë me një vlerë qindra mijëra euro, 62 kg marijuanë gati për t’u trafikuar, makinë presimi hidraulike për drogën, materiale e substanca për përgatitjen e drogës.
Sipas komunikatës së shtypit të policisë italiane, droga e ardhur nga Shqipëria përmes trafikantit të arrestuar ditë më parë ishte destinuar për t’u tregtuar në territorin e qytetit të Padovës.
Në konferencën e shtypit komandanti i policisë së Padovës, Gianfranco Bernabei, u shpreh i kënaqur për suksesin e këtij operacionin duke e quajtur “një goditje e fortë ndaj organizatave të trafikimit të drogës në territorin e tyre.”
Ndërkohë hetimet e policisë italiane vazhdojnë për identifikimin e arrestimin e bashkëpunëtorëve të trafikantit shqiptar.
