Një shqiptar 37-vjeçar në Itali është vrarë nga pronari i shtëpisë ku hyri për të grabitur.
Viktima quhet Valentin Frrokaj dhe, sipas shtypit italian, kishte shkuar për të grabitur italianin, tregtar bizhuterish.
Me të kanë qenë edhe dy të tjerë, të cilët tashmë janë shpallur në kërkim.
ParmaToday.it bën të ditur se Frrokaj ka qenë në burg, prej nga është arratisur më 2 shkurt 2013.
LiveSicilia.it shkruan se Frrokaj ishte arratisur nga burgu i Pagliarellit, Palermo, më 7 maj 2014.
Ishte dënuar me burgim të përjetshëm, për vrasjen e një shqiptari tjetër, në Breshia, më 2007.
Ngjarja e fundit ka ndodhur në Rodano, provinca e Milanos.
Në mbrëmjen e 24 nëntorit, tregtari po kthehej në shtëpi me një motor të vogël. Sapo hapi portën e jashtme të shtëpisë, u sulmua nga tre njerëz me fytyrë të mbuluar, të cilët e goditën me shqelma, grushta e shpulla. E kërcënuan dhe e detyruan të hapte derën e shtëpisë e të fikte kamerat e sigurisë. Flisnin italisht, por me aksent të huaj.
Në shtëpi ishte e bija dhe vajza 10 vjeç. Tregtari Rodolfo Corazzo, i cili mban gjithmonë armë me vete dhe në shtëpi ka armë të ndryshme, kërkon të bashkëpunojë, sipas avokatit, por sapo hyjnë brenda shpërthen konflikti me armë zjarri, dinamika e të cilit ende nuk është e qartë.
Sipas informacioneve të para, pas të shtënës së parë, në ajër, anga ana e të zotit të shtëpisë, një prej grabitësve reagon e përgjigjet me një armë po nga ato të tregtarit. Corazzo gjithashtu përgjigjet dhe e godet. Hajduti bie i vdekur në vend, dy të tjerët ia mbathin.
Tregtari u shoqërua në rajonin e karabinierëve, ku iu morën deklaratat e para, më pas shkoi në spital.
