Është zhvilluar sot dita e dytë dhe e fundit e konsultimeve politike të presidentit italian Sergio Mattarella për formimin e qeverisë së re.
Partitë kryesore politike në vend kanë prezantuar para kreut të shtetit propozimin e tyre për ekzekutivin e ri italian dhe programin e tyre qeverisës.
Partia Demokratike u përfaqësua në këtë takim nga kryetari i përkohshëm i saj Maurizio Martina, i zgjedhur pas dorëheqjes së Matteo Renzit deri në pritje të zhvillimit të Kongresit të Partisë.
Partia Demokratike i ka referuar Presidentit të vendit se ajo është një minorancë parlamentare e synon të jetë një forcë opozitare e pa përfshirë në qeverisjen e ardhshme.
“Për ne nuk ekziston asnjë hipotezë koalicioni qeverisës me forcat e tjera politike, por mund të ndihmojmë vendin dhe në opozitë,”-deklaroj pas takimit me kreun e shtetit kryetari i PD Maurizio Martina.
“Kush ka fituar zgjedhjet të marr përgjegjësinë për të qeverisur,”-tha ai.
Gjithashtu Partia Demokratike ka kërkuar që programi i qeverisë së ardhshme, t’i kushtojë një vëmendje të veçantë problematikave sociale, çështjes së emigracionit, zhvillimit ekonomik si dhe konfirmimit të aleancave ndërkombëtare me rolin e Italisë për të konfirmuar integritetin europian.
Krejt ndryshe është qëndrimi i liderit të partisë Forza Italia, Silvio Berlusconi i cili ka kërkuar kreut të shtetit një qeveri të së djathtës si koaliconi fitues në zgjedhjet e 4 marsit.
“Qeveria e re italiane duhet të jetë një qeveri e qendrës së djathtë me kryeminstër të zgjedhur nga Partia Lidhja, forca fituese brenda koalicionti tonë,”-deklaroi Berlusconi.
“Italia ka nevojë urgjente për një qeveri për të përballuar e zgjidhur problemet e qytetarëve,”-u shpreh para gazetarëve Berlusconi. “Një qeveri e bazuar në një program koherent, e aftë për të punuar me numrin e duhur të mazhorancës në parlament për të arritur marrëveshje të qarta me forcat e tjera politike.”
Për Sivlio Berlusconin, koaliconi i qendrës së djathtë është i hapur të dialogojë me të gjithë, por është kundër populizimit e kundër një qeverie të bazuar tek urrejtja e frika.
Të njëjtin mendim ka shprehur dhe lideri i Partisë Lidhja, Matteo Salvinit, i cili e ka komentuar takimin me Presidentit Mattarella, si mjaft pozitiv e konstruktiv.
“I deklarova kreut të shtetit se jemi gati të qeverisim për 5 vite e ardhshme,”-tha ai. “Jemi kundër një qeverie të përkohshme dhe të improvizuar, jemi për një qeveri të qendrës së djathtë por është i pa evitueshëm fakti që në këtë qeveri të jetë pjesë dhe Lëvizja 5 Yje. Jemi kundër çdo vetoje e të hapur të dialogojmë me të gjithë për të pasur një ekzekutiv të qëndrueshëm. Programi ynë qeverisës do të jetë reforma në sistemin e punës, refomra e pensioneve e reforma fiskale.”
a.ç
