Itali, arrestohet ‘skifteri’ shqiptar
Policia italiane ka arrestuar një shtetas shqiptar, me akuzën e vjedhjes së pronës, kanosjes dhe pengmarrjes së një të mituri 10 – vjeçar. Emiljan Shelna 31 – vjeç, ka hyrë rreth orës 4 të mëngjesit në një banesë në qytetin e Padovas dhe ka tentuar të vjedhë sende me vlerë, por është ndjerë nga familjarët të cilët janë zgjuar. “Corriea Della Sera” raporton se në atë moment Shelna ka rrëmbyer djaloshin 10 -vjeçar dhe nën kërcënimin e një thike ka mbajtur larg prindërit e terrorizuar. Në atë çast fëmija tjetër i çiftit, vajza 15 – vjeçare, ka marrë telefonin dhe ka thirrur policinë, e cila ka ardhur në çast në banesë dhe ka neutralizuar shqiptarin.
Djaloshi i kërcënuar me thikë është shoqëruar menjëherë për në spital, pasi ka kaluar momente traume, por fatmirsisht nuk ka dëmtime fizike. Prindërit e fëmijës kanë falenderuar forcat e rendit, të cilat ndërhynë përpara se situata të rëndohej, dhe evituan pasojat tragjike. Emiljan Shelna, në dosjet e Drejtësisë italiane, rezulton si person me preçedentë penal.
