Luan Rama, ish-ambasadori shqiptar në Paris ka deklaruar në një intervistë me gazetën Dita se xhihadistët në Shqipëri i ka sjellë i pari Sali Berisha.
Rama thotë se ishte pikërisht ish-presidenti që vendosi që ta fuste Shqipërinë në Konferencën Islamike, në vitet ’90.
“Vendi ynë u bë problematik në kohën kur Shqipëria, e futur dhe e bekuar nga Berisha në Konferencën Islamike, u hapi dyert fondacioneve fetare dhe ‘bamirëse’, këtyre fondacioneve fantazmë me shtetas arabo-shqiptarë, të cilët fshihnin terroristë të kërkuar nga shërbimet sekrete perëndimore. Por kjo epokë mund të konsiderohet e kapërcyer.
Shteti shqiptar aktualisht është në vigjilencë për të vepruar kundër çdo shfaqjeje xhihadizmi.
Por megjithatë, lufta kundër radikalizimit në mjediset fetare është një luftë e vazhdueshme pasi disa predikatorë shqiptarë, ashtu si në Kosovë apo në Maqedoni, kanë predikuar xhihadin në mënyrën më të hapur, madje përmes mediave publike dhe nuk janë cenuar aspak për deklaratat e tyre të nxitjes së urrejtjes”, thotë Rama në intervistën për gazetën.
