Teologët e Shtetit Islamik kanë nxjerrë një rregullore të detajuar që përcakton se kur “pronarët” e femrave të skllavëruara nga grupi ekstremist mund të bëjnë seks me to.
Rregullorja, ose “fatwa” ka forcën e ligjit dhe me sa duket shkon përtej deklarimeve të mëparshme mbi këtë temë. Ajo hedh dritë mbi përpjekjet e grupit islamik për ri-interpretimin e mësive shekullore për të përligjur skllavërinë seksuale të grave në pjesët e Sirisë dhe Irakut që ka nën kontroll.
Fatwa është gjetur midis shumë dokumenteve të kapur nga forcat e operacioneve speciale të SHBA, gjatë një sulmi në Siri në maj, që kishte si objektiv një zyrtar të lartë të ISIS. Pjesë të dokumentit janë parë nga agjencia Reuters, e cila ka bërë të ditur sot lajmin.
Teologët shkruajnë se disa vëllezër muslimanë kanë shkelur rregullat e trajtimit të skllaveve. “Këto shkelje nuk lejohen nga Sherihati”, shkruhet në Fatwa, ndaj edhe janë përmendur rregullat që “rregullojnë” sjelljen karshi skllaveve.
Midis rregullave fetare është ndalimi i një babai dhe të birit që të bëjnë seks me të njëjtën skllave ose që pronari që ka në skllavëri nënë e bijë mund të zgjedhë midis tyre, por nuk mund të bëjë seks me të dyja.
Rregullorja ndalon seksin me një femër që ka menstruacione, deri sa ato të kalojnë dhe të pastrohet plotësisht.
Nëse femra është shtatzënë, duhet pritur deri sa të lindë për të bërë seks me të.
Nëse dikush ka në pronësi dy motra, nuk mund të bëjë seks me të dyja. Motra me të cilën nuk bën seks duhet të shitet, dhurohet ose të lihet e lirë.
Nuk lejohet seksi anal me skllavet.
Nuk lejohet aborti nëse femra është shtatzënë.
Nëse një femër lihet shtatzënë nga pronari i saj, ajo nuk mund të shitet dhe lihet e lirë pas vdekjes së tij.
Pronari i një femre nuk mund ta shesë atë tek një individ që e di që do t’i bëjë keq ose gjëra që Allahu i ndalon.
Nëse pronari e shet ose e liron femrën që ka skllave, ai nuk mund të bëjë më seks me të, pasi ajo nuk është më pronë e tij.
OKB dhe grupet e të drejtave të njeriut kanë akuzuar Shtetin Islamik për rrëmbi të vazhdueshme dhe përdhunime të mijëra grave e vajzave që nga mosha 12 vjeç, veçanërisht nga komuniteti Jazidi në veri të Irakut. Shumë syresh u janë dhënë luftëtarëve si shpërblim ose janë shitur si skllave seksi.
