Pavarësisht se prokurorët federalë deri tani e kanë cilësuar sulmin në Teksas si terrorist, nga Shtëpia e Bardhë thonë se është ende herët për ta lidhur me militantët e Shtetit. Zëdhënësi i Shtëpisë së Bardhë, Josh Earnest ka thënë se sulmi nga dy personat e armatosur është “ende nën hetime” dhe sipas tij është shumë herët në këtë moment të thuhet nëse ISIS është përgjegjës.
“Kjo është ende nën hetime të FBI-së dhe pjesëtarëve të tjerë të komunitetit të inteligjencës për të verifikuar ndonjë lidhje të këtyre dy individëve me ISIS apo ndonjë organizatë tjetër terroriste”, ka thënë Earnest. Dje, grupi ekstremist Shteti Islamik e ka marrë përgjegjësinë për sulmin duke thënë se autorët janë “dy ushtarë të kalifatit”.
Policia ka identifikuar autorët e sulmit si Elton Simpson dhe Nadir Soofi, të cilët po banonin bashkë në një apartament në Finiks të Arizonës. Ata hapën zjarr mbi një qendër ku po mbahej një konkurs për karikatura të profetit Muhamed.
Dokumentet e gjykatës tregojnë se Elton Simpson ka qenë nën mbikëqyrje që nga viti 2006 dhe në vitin 2010 ishte dënuar për dëshmi të rreme para agjentëve të FBI-së rreth dëshirës së tij për t’u bashkuar me xhihadistët në Somali. Edhe agjentët e FBI-së po vazhdojnë hetimet rreth këtij sulmi.
Redaksia Online
(JavaNews.al)
