Militantë që kanë lidhje të ngushta me grupin terrorist Al-Qaeda në Libi, kanë nisur një luftë që ata e quajnë “Lufta e Shenjtë”, në një lagje të Shtetit Islamik, pasi njëri prej zyrtarëve të tyre të lartë ishte qëlluar për vdekje nga një person me maskë, duke ndezur kështu konflikt mes dy grupeve ekstremiste rivale, dhe duke lënë 11 xhihadistë të vdekur nga përleshjet.
Sipas Associated Press, përleshjet filluan pasi personi i armatosur hapi zjarr mbi liderin e lartë të al-Qaeda, i njohur si rekrut i suksesshëm, Nasr Akr, i cili ishte i burgosur në Britani të Madhe nën akuzat për terrorizëm.
Xhihadisti 55-vjeçar që kishte luftuar edhe në Afganistan, u vra së bashku me shoqëruesin e tij.
Përleshjet lanë të vdekur 9 militantë të ISIS-it dhe dy militantë të grupit që kanë lidhje të ngushta me al-Qaedan, përfshi këtu edhe Salem Derbi’n, komandant i grupit të ashtuquajtur Brigada Abu Salem, i cili njihet për armiqësinë e madhe me ISIS.
Grupi xhihadist i Akr që njihet si Këshilli i Xhihadistëve të Darnas, ka njoftuar për vrasjen e tij të mërkurën, duke fajësuar Shtetin Islamik. Ata akuzuan ISIS-in për tirani dhe kriminalitet, dhe u betuan që do të bëjnë Luftë të Shenjtë kundër tyre, derisa t’i shfarosin që të gjithë.
Ata po ashtu u kanë bërë thirrje edhe banorëve që t’iu bashkohen në luftë kundër xhihadistëve.
ISIS kishte filluar veprimtarinë si pjesë përbërëse e al-Qaeda’s, por filloi të ndahej dhe të bëhet organizatë në vete me shtrirjen e aktivitetit në rrjetet sociale dhe internet. Mësohet se dy grupet janë përplasur edhe në Siri më herët.
