Një shtetas i Republikës së Kosovës është arrestuar në Kuala Lumptur të Malajzisë, i dyshuar si bashkëpunëtor i ISIS. Gazeta “Express” ka bërë të ditur se ngjarja ka ndodhur më 15 shtator nga autoritetet malajziane dhe ato të SHBA. Mbi shtetasin 20-vjeçar, student, rëndon dyshimi se ka dhënë informacione për anëtarët e shërbimeve amerikane. Shefi i policisë malajziane, Khalid Abu Bakar, ka thënë se hetimet fillestare tregojnë se i dyshuari ka qenë në kontakt me një udhëheqës të lartë të Shtetit Islamik në Siri. Ai akuzohet se ka siguruar informacionet për shërbimet amerikanë duke hyrë në mënyrë të paligjshme në disa serverë. Khlalid ka thënë se i dyshuari ka hyrë në Malajzi në gusht të vitit 2014 për të studiuar shkencat kompjuterike dhe se do të ekstradohet në SHBA. Nga kjo e fundit, Departamenti i Shtetit e ka identifikuar të dyshuarin si Ardit Ferizi.
