Obsesioni për të krijuar një raport dashurie me një studente, rezidente në Qytetin Studenti, ka çuar deri në kufijtë e kryerjes së një vepre penale një 25-vjeçar në Tiranë.
Ai ka këmbëngulur ta takonte studenten duke i shkuar te dera e konviktit apo e shkollës së saj.
I riu A. J. është kallëzuar për “përndjekje” nga vajza që donte medoemos të takonte. Pak ditë më parë, ai u shpall fajtor nga Gjykata e Tiranës dhe u dënua me 6 muaj heqje lirie.
Referuar kallëzimit të studentes, në dhjetor të vitit të kaluar, ajo është kontaktuar në telefon nga i pandehuri, i cili i është prezantuar si “A. J., komshi i saj, se kërkon që të lidhet seriozisht me të… Pasi ka folur me xhaxhain e saj dhe ai i ka thënë se familja është dakord”. Kallëzuesja i ka shprehur nëpërmjet telefonit që: “Nuk dua t’ia di me kë ke folur, përgjigjja ime është jo” dhe i ka mbyllur telefonin. Pas kësaj i pandehuri ka vijuar veprimet e tij duke shkuar te puna e motrës së kallëzueses dhe duke u prezantuar si “djali i xhaxhait të saj”.
Sipas gjykatës, mandej ai ka shkuar te godina e banimit të kallëzueses, ku i ka kërkuar recepsionistes që të njoftonte për takim kallëzuesen. Duke qenë se i pandehuri ka ngulmuar për të takuar kallëzuesen dhe ka tentuar të hyjë forcërisht në godinë, recepsionistja ka njoftuar policinë. Pasi kanë mbërritur shërbimet e policisë gjyqësore, e kanë shoqëruar të pandehurin dhe e kanë këshilluar që të mos bezdisë më vajzën as në shkollë, as në banesë, raporton Panorama.
Pas fillimit të pushimeve verore, kallëzuesja ka ndërruar numrin telefonik të saj, me qëllim që personi të mos e merrte dhe shqetësonte më. I pandehuri ka vazhduar t’i dërgojë SMS në numrin telefonik të ri të kallëzueses. Po ashtu ai i ka shkruar në adresën e saj në “Facebook” dhe kallëzuesja, e ndodhur në këto rrethana, i ka bërë “bllok”.
Disa ditë më pas, ai i ka shkuar përsëri te shkolla kallëzueses. Kallëzuesja ka dërguar dy shoqe të saj, të cilat i kanë kërkuar të largohet, ai ka këmbëngulur duke u thënë se kishte një mesazh për studenten. Në të tilla kushte, studentja ka lajmëruar motrën e saj dhe më pas ka depozituar kallëzim në Polici.
“Të gjitha veprimet e të pandehurit në trajtën e kryerjes së thirrjeve telefonike në numrat celularë të kallëzueses, komunikimeve në rrjetin social ‘Facebook’, kontakteve me familjarë të studentes dhe me rrethin shoqëror të saj, prezantimi në disa raste jo me emrin e tij të vërtetë, kanë pasur një natyrë të qartë ngacmuese, fyese dhe kanë krijuar te kallëzuesja një gjendje të rëndë ankthi e pasigurie”, arsyetonte gjykata./ Panorama/ a.k
