Kreu i grupit parlamentar të PS-së, Taulant Balla, ndërsa replikoi me kryedemokratin Sali Berisha lidhur me investimet e huaja në Shqipëri, e ironizoi këtë të fundit për rizgjedhjen në krye të PD-së.
Sipas Ballës, Berisha fitoi një garë të fortë në PD, edhe pse në zgjedhjet për kreun e partisë në garë ishte vetëm ai.
“Urime edhe njëherë për fitoren në krye të PD-së, pasi ishte një garë e fortë. Urime edhe njëherë”, tha Balla.
Sa i përket investimeve të huaja në Shqipëri, Balla tha se ato janë trefishuar gjatë qeverisjes së PS-së krahasuar me vitin e fundit kur në pushtet ishin demokratët.
“Për publikun vlen që gënjeshtrës t’i përgjigjesh me shifra dhe fakte. Në parantezë, nuk mund të mos vlerësoj qëndrimin pro investimit. Një investim historik, më i madhi në historinë e Shqipërisë. U tha këtu që investimet e huaja kanë rënë. Investimet e huaja direkte në vitin 2012, që mbahet si viti më i mirë dhe i fundit i juaji, zoti Sali, ishin 666 milionë euro. Në vitin 2025, shifra e investimeve të huaja direkte shkon në 1.64 miliardë euro. Me matematikën e Lulit, 666 mund të jetë më e madhe se 1.64 miliardë, por investimet e huaja në Shqipëri janë rritur 2.5 herë nga koha kur qeverisnit ju, zotëri. Urime edhe njëherë për fitoren në krye të PD-së, pasi ishte një garë e fortë. Urime edhe njëherë. Sa i përket GDP-së, në vitin 2021 ishte 9.5 miliardë euro, ndërkohë që në vitin 2025 kemi kaluar 27 miliardë euro, pra e kemi trefishuar ekonominë në një kohë kaq të shkurtër, si asnjë vend tjetër i rajonit”, theksoi Balla.
