Një ngjarje e rëndë është regjistruar sot në fshatin Starovë në Berat, ku një 68-vjeçar i identifikuar si Syrja Hoxha teksa ishte duke mbledhur arra bashkë me familjen në tokën e tij, nga pakujdesia ka rënë nga pema dhe për pasojë ka humbur jetën.
Lartësia nga e cila ka rënë i moshuari ka qenë fatale pasi ai ka gjetur vdekjen e menjëhershme menjëherë pas rënies në tokë. Familjarët e tmerruar kanë njoftuar menjëherë policinë që ka shkuar në vendngjarje, ndërkohë që trupi i pajetë i të moshuarit është transportuar me ambulancë drejt Morgut të Spitalit Rajonal të Beratit, ku viktima Syrja Hoxha do t’i nënshtrohet autopsisë mjeko-ligjore, që do të konfirmojë edhe shkaqet e vdekjes.
Mësohet se familjarët e Hoxhës por edhe bashkëfshatarë të tjerë, dëshmitarë në vendngjarje, janë duke dhënë deklaratat e tyre në polici në lidhje me ngjarjen e rëndë aksidentale që i mori jetën 68-vjeçarit.
