Pas ngjarjes së ndodhur mbrëmjen e djeshme ku Leart Kurti ndërroi jetë në rrethana të dyshimta pasi u kap nga policia, ka folur babai i 32-vjeçarit.
Artur Kurti tregoi për Top Channel se ende nuk e ka parë trupin e djalit dhe se ka qëndruar gjithë natën jashtë morgut, ku ende nuk ka marrë asnjë shpjegim.
“Asnjë autoritet nuk më ka kontaktuar, ata e mbytën. Ku ka shtet. Gjeta ata të SHKB-së aty më thanë që nuk dinë gjë. Nga ora 10-11 do të themi, thanë. Leari nuk ka qenë person i rrezikshëm për ta trajtuar në ato lloj formash. Djali nuk ka pasur asnjë problem shëndetësor, ishte 2 metra si luan,” thotë Kurti.
I riu Leart Kurti ka qenë person i proceduar më herët nga policia, dhe për këtë arsye patrulla e ka ndaluar gjatë mbrëmjes. Por ai nuk i është përgjigjur thirrjes dhe ka nisur të vrapojë.
‘Ka qenë i proceduar penalisht dy ose 3 herë më parë. Kanë pasur dyshime se mund të kishte objekte të paligjshme, ose dhe nga sjellja e tij. Në momentin që i kanë bërë shenjë të ndalonte, ai ka vrapuar. Polica ka kërkuar ndihme nga kolegët dhe e kanë kapur në zonën e Don Boskos.
I riu nuk ka mundur të hyjë brenda komisariati pasi është ndjerë keq në oborr dhe aty është ulur në ambientet e jashtme, teksa më pas u shoqërua në spitalin e Traumës. Policia nga ana tjetër thekson se ndaj të riut nuk është ushtruar dhunë.
/s.f
