Ish-ministri i Jashtëm i Shqipërisë Tritan Shehu ka kujtuar marrëdhënien dhe njohjen e tij personale me ish-Kryeministrin italian Silvio Berlusconi, i cili u nda nga jeta të hënën.
Në një lidhje me Skype për emisionin Opinion në Tv Klan, Tritan Shehu ka ndarë me publikun takimin e tij të parë me Berlusconin në vitin ’95.
“Për herë të parë e kam takuar pasi u rrëzua qeveria e tij e parë. Fillim i vitit ‘95. Isha Sekretar i Përgjithshëm i PD dhe filluam të ishim aktivë në politikën e jashtme veçanërisht me Greqinë dhe Italinë. Takimi i parë është bërë diku në një hotel. Unë vajta atje, ata ishin në këshill kombëtar. E lajmëruam që kemi ardhur. Ai me shumë xhentilesë bëri një ndërprerje të këshillit kombëtar. I shpjeguam, folëm dhe i them ky zotëria që është këtu me mua, ishte Tomor Dosti, dhe që është kaq i kulturuar, e dini që ka bërë 45 vjet burg në kampe përqëndrimi. Ai ngeli. Kështu ka ndodhur, ky njeri ka këtë të kaluar. Si është e mundur? Ja shpjegojmë historitë. Ai u emocionua shumë. Dolëm, hajde me ne tha, vajtëm në skenë. Vijnë të gjithë. Shikoni tha, ky njeri ka bërë 45 vjet burg, kjo është tragjedia komuniste. E thoshte me një pasion të tillë. Berlusconi ishte njeri i madh”.
Tritan Shehu kujton edhe një tjetër takim me Berlusconin në vitin 2017, ku ka qenë së bashku me Sali Berishën dhe Lulzim Bashën.
“Berlusconi ishte njëri pluridimensional. Ai ishte shumë i sinqertë, shumë komunikues. E kam takuar dhe shumë herë. Në takim në Romë në 2017. Ishim për dakrë. Ishte Berisha, unë dhe Basha. Nga ana tjetër ishte Valentino Valentini, kreytari i grupit parlamentar të Senatit. Ka qenë një darkë e mrekullueshme. Ai servirte vetë, bënte shaka. I thoshte gjërat e mëdha kaq thjesht. Berlusconi shpëtoi Italinë nga katastrofat e mëdha, shpëtoi Italinë nga një revansh i komunizmit”.
Sipas Tritan Shehut, Berlusconi e vlerësonte Shqipërinë dhe Ballkanin Perëndimor.
/a.r
