Një ngjarje e rëndë ka ndodhur ditën e djeshme në Malin e Zi, ku një grua humbi jetën pasi u mbyt në lumin Moraça të Podgoricës.
Gruaja kishte rënë në lumë së bashku me një foshnjë, por kjo e fundit fatmirësisht arriti që të shpëtohej. Në fakt, heroi ishte deputeti shqiptar në Parlamentin e Suedisë, Adnan Dibrani, i cili e nxori foshnjën nga lumi dhe i shpëtoi jetën.
I ftuar në emisionin “Shqipëria LIVE”, Dibrani ka treguar se si arriti që ta shikonte foshnjën dhe gruan, e cila rezultoi që në fakt ishte gjyshja e tij.
“Unë kam qenë rastësisht në Mal të Zi, si vëzhgues për zgjedhjet. Kam dalë herët me disa deputetë për një konferencë dhe gjatë rrugës u ndalëm tek lumi duke biseduar. Në një moment kam parë një grua që po i afrohej bregut. Nuk e kuptova nëse kishte hyrë për të kërkuar diçka a se di. Më pas u afrova dhe pashë që gruaja po mbytej. Ajo kishte diçka në dorë, që dukej si kukull por kur e pamë mirë ishte foshnjë. Aty u alarmuam. Disa djem hynë për të nxjerrë foshnjën, teksa gruaja kishte ndërruar jetë. Djemtë e mbajtën thjesht në dorë foshnjën, në fillim mendova që ajo ishte nëna e bebes, por doli që ishte gjyshja. Sapo e pashë, e mora foshnjën në dorë dhe nisa t’i jepja ndihmën e parë që ta ktheja në jetë sepse nuk ishte i vetëdijshëm.
Unë jam baba i 3 fëmijëve, dhe i dija teknikat e shpëtimit. Në fillim nuk dija ç’të bëja por thjesht instinktivisht nisa t’i jepja frymëmarrje e ta godisja nga shpina. Në ato momente mendoja vetëm si ta shpëtoja. Doja vetëm ta dëgjoja teksa lëshonte zë. Kur shpëtoi më erdhi e gjithë situata dhe mendova për fëmijët e mi.”- tregoi ai.
/e.d
