Ish-zv.ministrja e Jashtme dhe anëtarja e Këshillit Kombëtar të Partisë Demokratike Edith Harxhi e ftuar në “Tonight Ilva Tare” në Ora News, duke e konsideruar si humbje katastrofike të PD-së, u shpreh se atë nuk e kanë votuar as funksionarë publikë dhe anëtarë të saj.
“Një humbje katastrofike. Mendoj se mungoi fryma. Lista ishte jo fituese dhe në të njëjtën kohë ishte listë përçarëse për sa i përket PD-së. Për këtë arsye, unë mendoj se ajo që ndodhi të dielën ishte një bojkot masiv i demokratëve, e cila çoi në fitoren masive të Partisë Socialiste por jo në ato numra nëse 20 për qind më tepër e popullsisë do të kishte votuar.
Kjo ka ardhur për arsye të bojkotit të elektoratit të Partisë Demokratike. Ka pasur një pjesë të madhe që nuk kanë votuar, midis tyre edhe shumë anëtarë të Partisë Demokratike, midis tyre edhe persona që kanë pasur funksione publike, por nuk mund t’i quash tradhtarë sepse ata nuk e kanë ndjerë që të votohej për një listë të tillë.
E dyta, besoj që ajo që ka qenë problem i madh është edhe mos transparenca e marrëveshjes së 18 majit, e cila ka krijuar mosbesim tek demokratët e vërtetë”, tha Harxhi.
