Për deputetin e PSD-së, Dardan Molliqaj, më i rëndësishëm se fakti se kush e udhëheq dialogun e Kosovës me Serbinë është fakti se Kosova nuk ka platformë për atë se çfarë duhet të bisedohet.
“PSD-ja ka insistuar e para që të bëhet platformë për dialogun me Serbinë. Më i rëndësishëm se fakti se kush është në krye të dialogut për PSD-në është se cila është platforma e Kosovës dhe cili është pozicioni i Kosovës në këtë dialog”, ka thënë Molliqaj në Interaktiv të KTV-së.
Ai ka thënë se edhe ata që po e kundërshtojnë tash edhe ata që e kanë kundërshtuar në t kaluarën po bëjnë garë se kush ta drejtojë dialogun.“Por nuk ka dakordim se për çfarë duhet e për çfarë nuk duhet negociuar”, ka thënë Molliqaj.
Molliqaj ka thënë se as LDK-ja e as Vetëvendosje nuk kanë treguar gatishmëri për seancë të jashtëzakonshme në të cilën do të flitej për dialogun.
“Ne kemi kërkuar seancë në të cilën Thaçi në krye të dialogut do të duhej të miratohet me 2/3 e deputetëve, që ne besojmë se s’do ta arrinte. Vlerësimi im, që mund të jetë edhe i gabuar, është se edhe Vetëvendosje edhe LDK-ja, janë dorëzuar karshi faktorit ndërkombëtar dhe e kanë pranuar Thaçin si kryenegociator”, ka thënë Molliqaj, përcjell Koha.net.
“Nëse nuk je që Thaçi me udhëheqë dialogun, nëse je që Kuvendi të marrë barrën për dialogun dhe nëse je që të bëhet platformë për dialogun atëherë pse nuk po i japin nënshkrimet”, ka thënë më tej ai.
Tutje, Molliqaj ka thënë se “nuk ka gatishmëri as LDK-ja as Vetëvendosja të ngre mocion votëbesimi për Qeverinë Haradinaj”. “Për 5 minuta mund t’i mbledhim nënshkrimet tona, nëse ata i kërkojnë. Por ata nuk do ta bëjnë këtë, sepse faktori ndërkombëtar e ka bërë të qartë se nuk ka zgjedhje pa përfunduar dialogu.
Unë po i ftoj publikisht edhe LDK-në edhe Vetëvendosjen që të na japin nënshkrimet për rrëzimin e Qeverisë Haradinaj. Unë po ju them sonte se as LDK-ja e as VV-ja nuk do t’i japin nënshkrimet. Ose le ta nisin ata, ne do t’ua japim”, ka thënë Molliqaj.Ata, duke lënë të kuptohet se është fjala për anëtarët e VV-së, nuk janë për nisma, por për intervista.“Ka një garë brenda opozitës se kush është më opozitë.
Hajde po dalim se kush është gati për zgjedhje dhe kush është gati ta pengojë Thaçin. Ne sfidojmë LDK-në dhe VV-në të na japin nënshkrime për të dyja këto çështje”, ka thënë ai.Molliqaj ka thënë se PSD-ja është gati për zgjedhje, derisa ka thënë se nuk do të diskutohet kalimi i pragut.
Duke iu referuar sondazhit të KDI-së, që PSD-së i dha vetëm rreth 2 për qind, Molliqaj ka thënë se kjo nuk do të dalë e saktë në rast të zgjedhjeve. (b.an)
