Në pjesën e dytë të intervistës në gazetën “Dita” për ngjarjet e 12-14 shtatorit 1998 në Tiranë, ish-truproja i Berishës, protagonist i atyre ditëve, Izet Haxhia thotë se shumë nga emrat e asaj kohe janë aktivë në politikë dhe mund të flasin.
Ai thotë se një nga personat që mori në duar telefonin e zhdukur të Hajdarit pas vrasjes nga i cili mund të dilnin shumë të dhëna hetimore, është Petro Koçi, sot zv.ministër i Mbrojtjes.
Haxhia e përshkruan kështu momentin e daljes së Hajdarit nga selia e PD, pak minuta para se të qëllohej:
“…Duke zbritur shkallët ka marrë në telefon një person të regjistruar me emrin “Jovanoviç” nga Fieri, me emrin Ismet Jovani. Ismeti ishte mik me Nehat Kullën, por edhe përdorej nga Azemi për të marrë të dhëna nga Nehati, pasi Nehati ishte mik me Feriz Kërnajën, i cili ishte njeri i besuar i Haklajve. Azemi mund ta ketë pyetur këtë person që a kanë ardhur Haklajt në Tiranë apo jo. Akuza ndaj meje ka qenë që gjoja unë e kam marrë në telefon Hajdarin dhe e kam nxjerrë në prite. Kjo është arsyeja e zhdukjes së telefonit celular të Azemit nga aleancat e përjetshme të klanit të krimeve e të mosndëshkimit të tyre në Shqipëri. Ky telefon është marrë nga punonjës të policisë e prokurorisë që ka bërë këqyrjen e vendngjarjes dhe i është dorëzuar ministrit qe ka ardhur pas Perikli Tetës dhe ky eshte Petro Koçi. Unë i bëj thirrje Petro Koçit që të tregojë të vërtetën në lidhje me celularin e Azemit…” tregon ai
Haxhia thotë gjithashtu se deputeti i sotëm demokrat Islami, në atë kohë zv.kryeministër i Nanos u dërgua në zyrën e tij me një mesazh nga organizatorët e grushtit të shtetit.
“…Sipas atyre që kam dëgjuar atë ditë Fatos Nano është kërcënuar dhe detyruar të iki në fshehtësi. Në PD më thanë që i eshte derguar me zv.kryeministrin Kastriot Islami nje plumb. Kaçi i ka shkuar në zyrë dhe i ka dhënë plumbin Fatosit në mënyrë simbolike, që donte të thoshte se mesazhi i tyre është që po nuk u largove do të vritesh. Dhe Fatosi që atë natë është larguar dhe është gdhirë në Dajt. Të nesërmen, pak para se të fillonte mësymja kundër Kryeministrisë, ka marrë rrugën e arratisë, pa pritur ceremoninë e varrimit të Azemit. Për këtë më mirë pyesni ish-ministrat e Nanos dhe ata që kanë qenë pranë tij në atë kohë…” thotë Haxhia
