Ish-Presidenti i Republikës, Bamir Topi, e sheh kërkesën e fundit të SPAK për heqjen e imunitetit të numrit dy të qeverisë si provën se Prokuroria e Posaçme ka fituar autonominë absolute nga politika.
I ftuar në emisionin “Trialog” në RTSH, përballë gazetares Alba Alishani dhe analistëve Preç Zogaj, Lorenc Vangjeli e Arion Sulo, ish-kreu i shtetit bëri një analizë të mprehtë të raportit mes kryeministrit Edi Rama dhe drejtësisë së re.
Sipas Topit, qëndrimi i Kryeministrit ndaj SPAK diktohet nga rrethanat momentale.
“Po të ndjekim Ramën, shohim se një ditë është ndryshe, një ditë tjetër ndryshe. Një ditë thotë se kemi ndërtuar drejtësinë e re, ndërsa ditën që është keq vepron mbi bazën e instinkteve të mbrojtjes”, deklaroi Topi.
Për ish-presidentin, prova e vërtetë e mbështetjes ndaj drejtësisë do të ishte zgjatja e mandatit të prokurorëve të SPAK.
“Personi që krenohet për drejtësinë e re duhet të ishte i pari që t’i zgjaste afatin e funksionimit të SPAK”, theksoi ai.
Testi moral i Kuvendit
Bamir Topi vlerësoi se lëvizja e fundit e SPAK e vendos Parlamentin shqiptar në një pozitë jo vetëm juridike dhe politike, por edhe morale. Ai kritikoi zbehjen e rolit të Kuvendit pas ndryshimeve kushtetuese të vitit 2008, duke theksuar se kryeministrat nuk kanë respekt për këtë institucion.
“Me këtë kërkesë, SPAK fut në lojë institucionin më të rëndësishëm që ka një republikë parlamentare. Ka futur në lojë Kuvendin duke e vendosur atë në pozicion jo vetëm juridik, por dhe moral e politik. Kur të fillojnë debatet politike do ta shohim ku janë”, u shpreh ish-presidenti.
Pavarësisht presioneve, Topi vlerëson se prokuroria speciale ia ka dalë të ndërtojë personalitetin e saj. “Nuk ka qenë rrugë e lehtë. SPAK e ka fituar këtë. Ka krijuar një autonomi absolute nga politika dhe kjo është një nga meritat e tij”, përfundoi Topi.
