Ish-presidenti i Pakistanit, gjenerali Pervez Musharraf, që sundoi Pakistanin për gati një dekadë pasi mori pushtetin në një grusht shteti pa gjak në vitin 1999, ka ndërruar jetë në Dubai në moshën 79-vjeçare.
Musharraf, vdiq në spital pas një sëmundjeje të gjatë. Ai u shtrua në spital në Emiratet e Bashkuara Arabe vitin e kaluar.
Ushtria pakistaneze konfirmoi vdekjen e tij në një deklaratë, duke shprehur “ngushëllime të përzemërta për vdekjen e gjeneralit Pervez Musharaf, ish-president dhe Shef i Shtabit të Ushtrisë”.
“Allahu e bekoftë shpirtin e të ndjerit dhe i dhëntë forcë familjes”, thuhet në deklaratë.
Musharraf erdhi në pushtet me një grusht shteti në vitin 1999 që rrëzoi qeverinë e Naëaz Sharifit dhe vazhdoi të mbajë presidencën nga viti 2001 deri në 2008, kur dha dorëheqjen për të shmangur shkarkimin. Që atëherë ai e kaloi shumicën e kohës në mërgim të vetë-imponuar në Mbretërinë e Bashkuar dhe Lindjen e Mesme.
Një aleat kyç i SHBA-së pas sulmeve të 11 shtatorit, ai mbështeti “luftën kundër terrorit” të SHBA-së pas 11 shtatorit, pavarësisht kundërshtimit të brendshëm.
Koha e tij në pushtet u bë e njohur për shtypjen dhe abuzimet e të drejtave të njeriut, veçanërisht në vitet e fundit. Në vitin 2007 ai pezulloi kushtetutën, vendosi ligjin ushtarak, shkarkoi kryetarin e gjykatës supreme dhe arrestoi aktivistë dhe avokatë, duke shkaktuar protesta masive.
Pas dorëheqjes në vitin 2008, Musharraf u kthye nga mërgimi i vetë-imponuar në mars 2013 në një përpjekje katastrofike për të konkurruar në zgjedhjet e përgjithshme të atij viti. Procedurat ligjore për tradhti të lartë kundër tij filluan në vitin 2014, por në vitin 2016, Musharraf u lejua të largohej nga vendi për arsye mjekësore.
Në vitin 2019, Musharraf u shpall fajtor për tradhti për pezullimin e kushtetutës dhe vendosjen e rregullave të jashtëzakonshme në vitin 2007. Ai u dënua me vdekje, por ky vendim u anulua më vonë.
Ai u kishte mbijetuar tentativave të shumta për vrasje dhe e gjeti veten në vijën e parë të luftës midis islamistëve militantë dhe Perëndimit.
/a.r
