Një ditë pasi përcolli për në banesën e fundit bashkëshorten e tij, Barbara, ish-presidenti i SHBA George H.W. Bush (i madhi) shtrohet vetë në spital në gjendje të rëndë shëndetësore.
Ai është shtruar në spitalin e Huston, pas një infeksioni që i është përhapur në gjak. Lajmin e ka bërë të ditur zëdhënësi i familjes Jim McGrath, përmes një postimi zyrtar në Twitter.
“Presidenti Bush u shtrua mëngjesin e së hënës në Spitalin e Hustonit pas një infeksioni. Mjekët po kujdesen për të. Po u përgjigjet mirë kurave dhe gjendja është duke u përmirësuar. Të tjera informacione do të publikohen në vazhdim”, shkruan zëdhënësi i Bush.
Megjithatë, mediat amerikane thonë se gjendja e ish-Presidentit mbetet kritike edhe për shkak të moshës së thyer.
Bush zbuloi disa vjet më parë se vuan nga një formë Parkinsoni, e cila e ka lënë atë të paaftë për të ecur. Gjendja e tij u përkeqësua edhe pas vdekjes së gruas së tij, Barbara Bush pak ditë më parë në moshën 92-vjeçare.
Në fjalimin e lamtumirës për bashkëshorten e tij Barbara, Bush deklaroi: “Kemi besim se ajo tani është në parajsë dhe jeta duhet të vazhdojë, ashtu siç ajo e ka dëshiruar”./a.m.
