Një ditë pas miratimit të listave zyrtare të kandidatëve për deputetë, në PD-në e Vlorës ka ndodhur një “tërmet” i vërtetë.
Kreu i listës së këtij Qarku, Bujar Leskaj, ka hedhur akuza të forta se vendet në listën e Vlorës u shitën.
Për këtë arsye, ai ka vendosur të japë dorëheqjen si kandidat për deputet.
Duke parë situatën e rëndë të krijuar, e cila mund t’i japë një goditje të fortë PD-së në Qarkun e Vlorës, do të duhej që Lulzim Basha të shkonte vetë në Vlorë, për të sqaruar situatën dhe sheshuar konfliktin.
Por, në mënyrë surprizë, aty kanë dërguar një ish-polic, që nuk ka asnjë rol politik në PD, përveç sigurisë: Agron Kuliçin e famshëm.
Tani se çfarë do një personazh me plot dritëhije, që nuk ka asnjë lidhje me politikën dhe Vlorën, të shkojë dhe të sqarojë situatën, ndoshta duhet ta shpjegojë Lulzim Basha, ose Berisha, se me gjasë ai e ka dërguar.
Interesant është fakti se pasi dërguan Kuliçin, PD lëshoi edhe një deklaratë, ku shprehej se lajmi për dorëheqjen e Leskajt është një sajim i Ramës.
“Lajmi për dorëheqjen e drejtuesit politik te PD ne Vlore Bujar Leskaj është i pavërtetë. Është një shpifje dhe trillim i Edi Ramës. Zoti Leskaj është në krye të detyrës, në udhëheqje të ekipit fitues të PD ne qarkun Vlorë”, thuhet në reagim.
Fakt është që përplasja e madhe ka ndodhur dhe vetë Leskaj ka fikur telefonin dhe nuk përgjigjet.
Në një situatë të tillë, ai që duhet të reagojë është pikërisht Leskaj, se ai ka dhënë dorëheqjen, jo PD, e cila për çdo gjë ia hedh fajin Edi Ramës.
Tani nuk dihet se si do të shkojë situata dhe nuk është çudi që Leskaj të bëjë edhe një prapaktheu në vendimin e tij, duke parë presionin e madh që po i bëhet.
Se jo më kot i çuan një njeri si Agron Kuliçi, që në një raport të Ambasadës amerikane thuhet se bashkëpunonte me kriminelë të tipit si Dritan Dajti./ TemA
