Tentativa për grabitje e kryer nga ish-efektivi i FNSH-së në Fier, Eduard Budini, duket se e kishte zanafillën te borxhet që ai kishte ndaj personave të tretë. Gazeta Shqiptare ka siguruar një vendim gjyqësor, ku Budini tashmë nën pranga, ishte paditur nga një huadhënës për mosshlyerjen në kohë të detyrimit që efektivi i kishte marrë. Sipas vendimit gjyqësor, rezulton se Budini i kishte marrë borxh shtetasit me inicialet D.K., po nga Fieri, por nuk kishte mundur ta shlyente në afatin e përcaktuar në aktin noterial.
Në këto kuste, D.K. kishte vendosur t’i drejtohej gjykatës dhe kjo e fundit kishte detyruar Eduard Budinin që, krahas shumës së huasë, të paguante edhe normën e interesit në favor të huadhënësit. Me sa duket, i gjendur në vështirësi, pa asnjë mundësi konkrete që ta shlyente borxhin sipas përcaktimeve në kontratë, Budini ka zgjedhur dhe rrugën e shkurtër, atë të grabitjes së taksistit. Kjo për faktin se nga të dhënat zyrtare rezulton, se koha e padisë në gjykatë përafërsisht përkon edhe me kohën kur ai ka tentuar grabitjen. Dyshimet sipas prokurorisë se grabitja ka ndodhur për këtë shkak shtohen edhe më tepër, referuar deklarimeve të familjarëve të ish-specialit të FNSH-së, të cilët kanë shpjeguar se ai kohët e fundit ishte përballur me vështirësi të mëdha ekonomike.
Eduard Budini u arrestua disa muaj pas tentativës së një grabitjeje të një taksisti. Pamjet e sigurisë së taksisë, ku personi shfaqej duke kërcënuar me armë në kokë taksistin, u publikuan nga vetë Ministria e Brendshme, e cila kërkonte ndihmën e qytetarëve për të identifikuar grabitësin, në një kohë që bëhej fjalë pikërisht për një ish-efektiv të Forcave Speciale.
Një komentues në faqen online Balkanweb.com e identifikoi grabitësin dhe pas këtij momenti, policia vuri prangat në duart e njeriut që më herët kishte qenë pjesë e uniformave blu.
BW
