Nga ARTUR AJAZI
Edhe pse asokohe ishte e ndaluar loja dhe falli me letra, apo dhe falli me kafe turke, duket se njerëzit e gjenin mundësinë të merrnin lajm për vehten “të ardhmen” për fatin e vajzës apo djalit, apo dhe ndryshimin e vendit të punës. Aq u masivizua falli vitet e fundit në diktaturë, sa gratë joshën edhe burrat, madje dhe ata me kollare, për tu “hapur rrugën e karrierës” apo për të gjetur fatin e tyre në jetë.
Por që të ndoshte diçka e tillë edhe pas 30 vitesh nga ndryshimi sistemit, dhe që të merreshin edhe politikanët si gratë, me “parashikime dhe paragjykime” për cilindo që fiton garën elektorale, për cilindo kundërshtar që bëhet kryeministër, ministër apo kryetar partie, kjo nuk do të ishte besuar. Dhe më të prekshmit nga sindromi “fallxhorit” janë ata politikanë që e kanë shijuar “fatin” e tyre edhe në diktaturë, dhe të tillë në SHQUP, ka me shumicë.
Në gjirin e ish-opozitës së vjetër ka sot e kësaj dite, njerëz që përcaktojnë “fatin” e tjetrit, sa pushtet do të ketë, sa miliona euro ka bërë dhe do të bëjë, sa korrupsioni ka bërë dhe do të bëjë, sa vota ka humbur, dhe sa do të humbë në të ardhmen, sa vite jetë ka jetuar dhe sa i kanë mbetur akoma, dhe deri tek parashikimi yjeve për mijëvjeçarin tjetër. Dhe me të gjitha këto “xhavahire” dhe jo me poltikë, merret sot e gjithë ditën ish-opozita e vjetër. Një parti politike që ka rënë nga “fiku”, që ka humbur pushtetin në mënyrën më spaktakolare dhe që vazhdon të humbë terren politik dhe elektoral, arrin të merret gjithë ditën me fall filxhani.
Nuk ka vizitë, takim me njerëz të ndryshëm, apo dhe mbledhje qeverie që bën kryeministri i vendit, që të mos “parashikohet” para dhe pas tij, nga fallxhorët e SHQUP-it. Madje edhe aleanca me Monikën e LSI, kishte këtë qëllim, të forconte bashkimin e fallxhorëve në një “qëllim final”, marrjen e pushtetit me revolucion dhe pastaj me “tërmet”.
Të ngujuar në perimetrin e bollshëm të partisë tyre, ish-opozitaristët e SHQUP-it dhe aleatja e tyre e denjë Monika Kryemadhi, po perfeksionojnë sistemin e fallit me filxhan dhe me letra bixhozi. Të kripur në miliona euro, ata kanë arritur të krijojnë seksionet e fallxhorëve në Tiranë dhe rrethe, duke harruar se janë ende pjesë e politikës të vjetër.
Pothuajse në asnjë rast, ata nuk janë treguar të paktën qytetarë të denjë dhe solidarë, me ata që mbetën pa shtëpi dhe katandi, mes çadrave dhe në mëshirën e ndihmave nga shqiptarët dhe bota mbarë, por edhe kur vendi po përjeton momente fatkeqsish, janë marrë dhe po merren me falle filxhani.
E ndërsa në SHQUP, janë hedhur në sulm mbi qeverinë duke u bërë rrodhe, dhe duke penguar në misionin e saj të rehabilitimit dhe rindërtimit, në LSI Monika, po hedh fall me letra bixhozi, për të parashikuar fatin e pasurisë saj, duke kërkuar “largimin e Ramës”. Të shfazuar dhe të shpërfyturuar, ish-opozitaristët edhe në ditët e qametit qajnë hallin e pasurisë tyre, duke ju hedhur në fyt gjithkujt që u përmend mëkatet, milionat, dhe dorën e zhytur në korrupsion.
Tjerrësit e fallit me kafe turke dhe letra bixhozi, nuk pendohen edhe pse janë mëkatarë, pasi e kanë vendosur fatin e tyre tashmë, duke vënë gishtin në filxhan, dhe duke njollosur këdo që nuk është “demokrat” si Doktori dhe Lulzimi.
