Emisioni “Dua të të bëj të lumtur” do të nisë transmetimin në muajin janar. Arbana Osmani dhe stafi i saj kanë nisur punën, duke trokitur në dyert e familjeve shqiptare për t’i bërë ata të lumtur.
Në faqen zyrtare të emisionit është publikuar spoti dhe mes postierëve vihet re prezenca e modelit dhe aktorit Oni Pustina. Modeli rikthehet në ekran si postier i “Dua të të bëj të lumtur” në Shqipëri, pas suksesit që pati në emisionin e Maria De Filipit në Itali, vite më parë.
Pas një mungese të gjatë në ekran, Oni rikthehet me këtë rol, që do të thotë se do të trokasë në dyert e atyre që do bëhen pjesë e surprizave të programit. Ai së bashku me postierët e tjerë do të jenë të parët, që do të prekin emocionet e personazheve të ftuar.
Oni Pustina ka qenë edhe vitin e kaluar në puntatën e fundit të emisionit, si i përzgjedhuri i Arbana Osmanit për të surprizuar stafin. Ky është angazhimi i tij i dytë në showbiz, pasi u kthye në Tiranë dhe krijimit të familjes.
Pak kohë më parë, e pamë në klipin e Jonida Maliqit me titull “N’errësirë”, ku shihej në një “romancë” buzë detit me këngëtaren. Ish-modeli që bëri karrierë dhe mori famë të jashtëzakonshme në Itali, u shfaq sharmant në klip me thinjat e moshës.
Prej vitesh, Oni qëndron larg vëmendjes mediatike, pasi është përqendruar më shumë te familja që ka krijuar nga martesa me ish-balerinën, Linda Poda. Larg vëmendjes mediatike, çifti që u njoh në “Dancing with the stars” tetë vite më parë, prej tre vitesh është bërë me një vajzë.
Oni dhe Linda kanë zgjedhur të qëndrojnë jashtë vëmendjes mediatike, pasi, mesa duket, kanë dashur ta shijojnë në maksimum rritjen e fëmijës. Ish-postieri i Maria De Filipit dhe balerina elegante e disiplinave latine u njohën gjatë spektaklit “Dancing with the Stars”.
Nuk vonoi shumë dhe partneri skenik i Podës u bë partner jete. Që nga viti 2010, kur Oni fitoi spektaklin e parë të “Dancing with the Stars Albania”, Linda la kërcimin dhe iu përkushtua profesionit të juristes, ndërkohë që Oni merret me biznesin e tyre në Tiranë.
PANORAMA PLUS
