Ish-ministri i Jashtëm i PD-së, Besnik Mustafaj ka komentuar në lidhje me faktin se sa gjasa ka që të realizohet takimi mes kryeministrit Edi Rama dhe kryetarit të opozitës, Lulzim Basha, për të arritur më pas dialogun për të hyrë në zgjedhjet e 18 qershorit.
Teksa ishte i ftuar në rubrikën ‘Opinion’ në ‘News24’ Mustafaj komentoi situatën politike në vend dhe deklaratat e kreut të LSI-së, të cilat siç u shpreh, të çojnë tek një ambicie serioze për të marrë postin e kreut të ekzekutivit. “Kam dëgjuar me vëmendje deklaratat e tij të fundit, nga ato që thotë e artikulon. duket se ambicien për kryeministër e ka shumë serioze, nuk e ka sa për të shuar kureshtjen”,- tha ai.
E duke mos parë një rrugëdalje të qartë nga kriza, ish-ministri thotë se ka shumë gjasa që Shqipëria të shkojë drejt një skenari maqedonas. “Basha ka thënë se qeverisë teknike i duhen 100 ditë për të realizuar qëllimet që ka, më kryesorja është shkëputja e lidhjeve me narkotrafikun, që të mos financojnë zgjedhjet. Por kjo duket disi e largët”,- shtoi ish-ministri.
Ai u ndal gjerësisht tek thirrja e Ramës për dialog. Po ashtu, theksoi se kryeministri po tallet me ftesat e tij ndaj Bashës, shkruan ‘BalkanWeb’.
“Ne kemi parë situata të ngjashme kur opozita bojkotoi zgjedhjet. Nuk ishte në parlament, qeveria ishte jofunksionale. Nëse Rama e ushqen veten me iluzionin se mund të bëjë pa opozitën, duhet parë gjendja e tij psikike, siç thotë Lubonja. Kam përvojë të gjatë si negociator, qoftë kush isha dhe diplomat, por dhe kur isha në opozitë, kur punoja si këshilltar i Berishës. Në këtë rast vetëm ftesa nuk janë ato që dërgon Rama, pro janë në mënyrë të drejtpërdrejt tentativa të Ramës për të sabotuar dialogun.
S’duhet të thotë ‘Ëh mo Lul ku do shihemi?’ Këto janë fyerje të drejtpërdrejta, të fudullëkut të tij. Vjet është bërë një takim Basha-Rama dhe kryesorët nuk takohen në takimin e parë. Sheshohen gjërat si fillim. Ata bëjnë atë që është shtrimi i trasesë për të cilin do ecin dy liderët. Basha kësaj here po sillet si një njeri që do negociata, do punojnë ekipet disa orë, në mënyrë që të arrihet në një takim të lidershipit. Nuk besoj se nga ana formale Basha po bëhet pengesë.”, theksoi ai.
Ndër të tjera Mustafaj tha se nuk duhet të vendosen kushtet për tu ulur në një tryezë për dialog.
“Kjo është pengesë. Nëse i kërkohet palës që të vij pa kushte dhe ti nuk duhet të vësh kushte. Kushti është pengesë për arritjen e marrëveshjes. Rama duhet të thotë se nuk po bëhet, se nuk e pranoj këtë kush. Edhe unë nuk do ulesha në tryezë me ato talljet e Ramës.”, tha ai./BW/a.m.
