Në emisionin “Shqip” nga Rudina Xhunga ishte i ftuar ish-ministri i Mbrojtjes në qeverinë e Pajtimit Kombëtar, Shaqir Vukaj, për të na rikthyer pas në kohë në ngjarjet e 26 majit të vitit 1996 dhe ato që pasuan.
Ai tregoi se e ka parë vetë planin për sulmin në jug dhe vetë plani ka qenë në arkivën e Ministrisë së Mbrojtjes. Vukaj thotë se çuditërisht plani nuk ka një firmë në fund por nuk kishte dyshime në vërtetësinë e tij pasi ishte i detajuar në mënyrë perfekte nga ana ushtarake.
“Në ‘97 u shpërnda thirrja për rezervistë vetëm në Shqipëri të mesme dhe në veri, jo në jug sepse jugu do të sulmohej. Ishte plani i përgatitur. Plani ka qenë në arkivën e Ministrisë së Mbrojtjes, e kam parë. Por është interesante sepse plani nuk ka firma. Dhe siç më kanë thënë ushtarakë ai plan është përgatitur nga ushtarakë jo nga njerëzit e SHIK sepse ata nuk dinin. Nuk del kush e ka firmosur por është plan i rregullt ushtarak me harta dhe hollësira. Ishte menduar që forcat të përqëndroheshin në Përmet sepse prej aty do ndërmerrej sulmi”, u shpreh Vukaj/m.j
