Ish-ministri i Drejtësisë i LSI, Ylli Manjani, i drejtohet SPAK-ut përmes një postimi në rrjetet sociale, për çështjen e tenderave, pasi sipas tij, “në burg duhen futur ata që kanë bërë ligjin e prokurimit publik”.
Teksa ka postuar një foto të Nenit 1 dhe 2 të këtij ligji të miratuar një vit më parë nga mazhoranca socialiste, Manjani thotë se “të gjitha shkeljet e tenderave të sotëm tashmë janë legalizuar…”
“Nxirrini njerëzit nga burgu se rrinë kot aty! Po të keni këllqe, futni në burg ata që kanë bërë këtë ligj të MOS Prokurimit Publik!
Shiheni se si harxhohen paratë e buxhetit pa tender, pa garë. Të gjitha shkeljet e tenderave të sotëm tashmë janë legalizar…
Edhe kur behet ndonjë procedurë, kontratat janë afatgjata, njësoj si te koncensionet…
Aty ku kërkohet vlerësim konkret fjalitë në ligj fillojnë me “mund të…” Vlerësimi i fituesit është subjektiv…
Ndërkohë, sa për informacion, ata që bëjnë procedurën e vlerësimit të atyre pak firmave që marrin pjesë në ato pak gara, nuk janë përgjegjës as për hartimin e kërkesave të tenderit e as përgjegjës për lidhjen dhe zbatimin e kontratave. Nuk kanë qenë as me ligjin e vjetër…“, shkruan Manjani.
Kujtojmë që pak javë më parë në pranga ra ish kryebashkiaku i Lushnjes Fatos Tushe, i akuzuar nga SPAK për shkelje të barazisë në tendera.
/m.j
