Ish-Ministri i Jashtëm rus, Andrei Kozyrev e ka konsideruar luftën në Ukrainë si një akt barbar. Në një intervistë për CNN, Kozyrev u shpreh:
“Është një akt barbar. Nuk mund ta imagjinoja kur isha ministër i Jashtëm, ishte krejtësisht jashtë diskutimit”.
Më tej, ish-ministri rus deklaroi se sanksionet nga Perëndimi kundër Rusisë duhet të synojnë zyrtarët e lartë të shtetit dhe ata që marrin vendimet.
Ai paralajmëroi se sanksionet që synojnë presidentin rus Vladimir Putin dhe ministrin e Jashtëm Sergej Lavrov janë “si të mos bësh pothuajse asgjë – sepse asgjë, mendoj, nuk është në emrat e tyre… Nuk mund t’i gjesh asetet e tyre. Janë të vendosura të gjitha në emër të personave të tjerë”.
Të martën, Kozyrev me anë të një postimi në Twitter, u bëri thirrje të gjithë diplomatëve rusë të japin dorëheqjen nga postet e tyre në shenjë proteste ndaj pushtimit të vazhdueshëm rus të Ukrainës.
Kozyrev ishte ministri i parë i jashtëm i Rusisë nën Boris Jelcin pas shpërbërjes së Bashkimit Sovjetik./m.j
