Ish-ministri i Jashtëm i Kosovës Enver Hoxhaj i ftuar në emisionin Shqip nga Rudina Xhunga në Dritare TV, foli për vizitën e kancelares gjermane Angela Merkel sot në Shqipëri. Në mënyrë të veçantë Hoxha foli për marrëdhënien mes kancelares Merkel dhe kryeministrit Rama. Ai u shpreh se opinioni i krijuar në Berlin për kryeministrin shqiptar, është i një njeriu të besueshëm.
“Merkel për takimin e fundit të karrierës politike, nuk zgjodhi rastësisht Shqipërinë. Së pari është për shkak të pozitës gjeo-politike të vendit. Por edhe për shkak të aftësisë së kryeministrit Rama që vendos raporte ndër njerëzore dhe përtej politikës.
Këtë po e them nga përvoja ime. Për 7 vjet unë kam shërbyer si ministër i Jashtëm i Kosovës dhe e di mirë se çfarë përshtypje është krijuar për kryeministrin Rama në Berlin.
Njerëz të ngushtë të kancelares Merkel, këshilltarët dhe ata që qëndrojnë krah saj, e kanë parë me simpati dhe admirim. Rama njihet si të besueshëm në Berlin.
Nuk besoj që ka një tjetër politikan në Ballkan, që të jetë më i preferuar se sa Rama, për kancelaren Merkel. Mund të ketë shtete që kanë qenë më strategjike, por si politikan Rama ka pasur një bashkëpunim të mirëfilltë dhe një miqësi të veçantë. Qendrën e rëndesës tashmë e ka Tirana, jo Beogradi.
Mënyra se si Merkel i ka bërë vizitat e fundi të karrierës politike, e ka vendosur Shqipërinë në një hartë tjetër të interesit evropian. Se çfarë do të ndodhë më tej, do të varet shumë nga ata që do të pasojnë në qeveri.
Zoti Rama, jo vetëm me zonjën Merkel po edhe me të tjerë kapacitetin e tij, fuqinë e tij politike, e ka përdorur si rrallë kryeministër tjetër.
Në politikën e jashtme, kimia mes njerëzve, marrëdhëniet, botëkuptimet, përshtypjet, kauzat, janë shumë të rëndësishme. Dhe nisur nga raportet e mia miqësore me shumë diplomatë në Berlin, e di që kjo është ajo që thuhet dhe mendohet për kryeministrin Rama”, tha Hoxhaj.
/m.j
