Pensionistë dhe ish-minatorë kanë dalë sot në protestë para ambienteve të Parlamentit, ku nuk kanë munguar as përplasjet me forcat e policisë.
Një prej tyre papritur është ndjerë keq dhe është shtrirë përtokë, ndërsa është shprehur se ka probleme me zemrën dhe diabetin.
Një tjetër prej tyre i është drejtuar Parlamentit me një megafon, por është ndaluar nga një efektiv i policisë, i cili e ka tërhequr pas.
Mes tyre ka pasur konfrontime verbale, ku pensionistët kanë kërkuar të “mos preken me dorë”, nga forcat e rendit.
Ndërkohë 45 deputetë të Sali Berishës dhe Gazment Bardhit kanë ‘pushtuar’ sallën e seancave plenare duke mos lejuar nisjen e punimeve të Kuvendit.
Kjo vjen pasi demokratët ditë më parë kanë paralajmëruar qëndresë në seancën plenare të ditë së sotme, pas rrëzimit që mazhoranca i bëri tre kërkesave të tyre për ngritjen e komisioneve hetimore, përbërjes së Komisionit të Reformës Elektorale, si dhe përjashtimit të deputetëve nga punimet e Kuvendit.
Ata kanë zaptuar ulëset e ministrave dhe ambiente të tjera të sallës. Në pamundësi për të vijuar me rendin e ditës, deputetët e PS janë larguar duke pezulluar kështu punimet për sot.
Sot në Kuvend ndër të tjera ishte parashikuar një interpelancë e ministres Elva Margariti me deputeten Ina Zhupa.
/a.r
