29-vjeçari Ervin Duka ka mohuar në gjykatë akuzat për ‘Prodhimi dhe mbajtja pa leje e armëve luftarake dhe e municionit’, duke deklaruar se nuk kishte dijeni për personin që ka futur tritolin në shtëpinë e tij.
Gjatë seancës së sotme, ku gjykata vendosi ndaj Dukës masën e sigurisë arrest me burg, i riu nga Pogradeci tha: “Shtëpia është katër kate, nuk e di kush e ka futur tritolin”.
Pavarësisht pretendimeve të të pandehurit se nuk kishte lidhje me tritolin që u gjet në shtëpinë e tij, gjykata ka lënë në burg 29-vjeçarin, i cili rezultonte në vitin 2014 në listën e personave të larguar në Siri.
Pak ditë më parë, pas kontrollit të ushtruar në banesën e 29-vjeçarit Ervin Duka, u gjetën e sekuestruan në cilësinë e provës materiale një kallëp i dyshuar si lëndë shpërthyese tritol si edhe 89 copë fishekë model 54, kalibri 7.62mm.
Ervin Duka luftoi në Siri në konfliktin e atjeshëm dhe është kthyer në atdhe i plagosur, po në vitin 2014, kur policia e renditi në listën e të larguarve drejt Lindjes së Mesme.
Ndërsa gjykata jepte masen e sigurisë për Dukën, dhjetëra besimtarë kanë protestuar para gjykatës, për të kërkuar lirimin e 29-vjeçarit.
Si mashtroi Duka kur udhëtoi drejt Sirisë
I arrestuari nga fshati Gurras i Pogradecit, Ervin Duka nuk ishte i vetmi person që udhëtoi drejt Sirisë. Ai ishte larguar me të rinj të tjerë të fshatit drejt vendit të konfliktit. Sipas të dhënave të Policisë së Shtetit, në vitin 2014, Duka rezultoi se së bashku me të rinj të tjerë u largua drejt Sirisë, kurse nënës së tij 74-vjeçare i tha se po largohej drejt Arabisë Saudite.
Por duket se vajtja në Siri nuk i ka shkuar aq mirë sa ai ka pritur. Pak kohë pasi mbërriti aty, Duka është plagosur nga një predhë dhe u mjekua fillimisht në Turqi e më tej në Larisa të Greqisë.
Sipas policisë, Duka konsiderohet një person me rrezikshmëri./Shqiptarja/ma.me.
