Ish-kryeministri Vilson Ahmeti: Jam i habitur që po përmendet emri im për aferën e CEZ
Ish-kryeministri Vilson Ahmeti ka reaguar pas përmendjes së emrit të tij, në furtunën e akuzave të ngritura për marrje ryshfeti në lidhje me mbledhjen e borxheve të CEZ.
Një nga të përditshmet shqiptare shkruante sot, se ish-kryeministri shqiptar, që dyshohet se ka marrë ryshfet prej milionash nga një kompani që kontraktuar për të mbledhë borxhet e CEZ, është pikërisht Ahmeti.
Por, ky i fundit thotë se është habitur nga akuzat. Ahmeti thotë se që prej vitit 2009, nuk ka më asnjë pushtet.
“I bëj me dije mbarë opinionit se të dy shoqëritë e përfolura në këtë çështje, janë shoqëri private dhe si të tilla nuk kanë nevojë për një negociator apo ‘marifetxhi’ për të lidhur kontratë mes tyre. Në kushtet e mia, nuk di se çfarë mund t’i ofroja këtyre shoqërive për të arritur marrëveshjen mes tyre, kur dihet qartësisht se nuk kam patur pushtet në vitin 2009”.
Sipas asaj që kushdo kupton në mënyrë intuitive, asnjë person pa pushtet apo pa suport politik nuk mund të ndikojë në marrëveshje mes shoqërive private. “Është vetëm forca e shtetit ajo që mundëson një gjë të tillë dhe natyrisht kur ka vullnet nga palët në anën tjetër. Sa i përket pretendimit të një ryshfeti të paguar nga Hejsek, mund të them se nuk e kam takuar ndonjëherë këtë person,” vijon Ahmeti.
