Nga Ben Andoni
“Është e precizuar në kushtetutë, që presidenti i vendit vendos gjashtë muaj para për datën e zgjedhjeve dhe që atë ditë, ai nuk ka më asnjë lidhje me zgjedhjet dhe procesin zgjedhor. Ai është larg këtij procesi dhe në kushtetutë nuk përfshihet asgjëkundi, ku ai mund të ndërhyjë”.
Kristaq Kume, ish-kreu i KQZ-së dhe njohës i mirë i ligjit zgjedhor, shpjegon për Javanews se edhe vetë Kodi Zgjedhor nuk lejon hapësira përveç shtyrjes prej një jave të zgjedhjeve. “Është një fakt që e kam përsëritur disa herë, por që në këtë rast dua të them se nga KQZ-ja, zgjedhjet mund të shtyhen vetëm një javë dhe asfare më shumë”.
Por, ka një udhë tjetër, që e aktivizon presidentin e vendit. Ndërkohë që raundet për zgjedhjen e Presidentit po digjen pa kandidat të prezantuar, deri më tani është parashikuar nga ekspertët që në këtë mënyrë po shkohet në zgjedhje të parakohshme. Ky është momenti që presidenti i vendit merr sërish rol dhe Kushtetuta e detyron Presidentin e vendit të shpallë zgjedhjet e parakohshme, ”të cilat duhet të zhvillohen brenda një periudhe kohe deri në 45 ditë nga dita kur Kuvendi shpërndahet”.
Ndërkohë ish-kryetari i KQZ-së, pohon se nëse kjo krizë politike do vazhdojë atëherë zgjedhjet mund të mbahen në fund të korrikut. “Zgjedhjet mund të bëhen të dielën e fundit të muajit korrik, që do të thotë 42 ditë më vonë se dita 18 qershor”, kohë që lidhet me fundin e kësaj legjislature.
“Kushtetuta jonë njeh aktet normative, që do të thotë se në parlament mund të mblidhen të ndërhyjnë me një akt në Kodin Zgjedhor por kuptohet nëse të dy palët do kenë angazhimin e duhur për të bërë ndryshime në ligjin zgjedhor. Në këtë rast palët mund të ndërtojnë rregullat dhe të gjejnë besimin për zbatimin e tyre, si edhe të punohet me ndryshimin e dispozitës për balancimin e plotë të administratës zgjedhore”. Sipas tij, në kushtet që po krijohen, votimi elektronik me rregullat e veta mund të konsiderohet si mundësi që të zvogëlojnë ndërhyrjen në procesin zgjedhor të parave të pista, botës së krimit.
I pyetur për mundësinë e bërjes së votimeve përtej kësaj date, ai është shprehur se në këtë rast ndryshimet në Kodin zgjedhor nuk mjaftojnë. Duhet të ndërhyhet në Kushtetutë dhe kjo kërkon një angazhim të ri. (Javanews)
