Shtohen zëratt kritikë brenda Partisë Socialiste në Shkodër në lidhje me koordinimin e saj. Këtë radhë është ish-kandidatja për deputete e selisë rozë, Rozafa Zmijani, e cila shprehet se kjo situatë vjen për shkak të mungesës së një lideri të vërtetë.
Në një intervistë dhënë për gazetën “Dita”, Zmijani e cilëson PS në Shkodër si “pula pa krye”, duke iu referuar caktimit si koordinator të Ditmir Bushatit.
“Socialistët e Shkodrës si pula pa kry. Ne kemi këtë shprehje të bukur, pavarësisht se në këtë rast nuk tingëllon shumë mirë. Arsyeja se pse nuk ka optimizëm është sepse në mbledhjen e fundit, që më shumë ishte për të dhënë direktiva, socialistët prisnin diçka më konkrete. Fakti që nuk kishte diçka konkrete, them që bën që të mos ketë optimizëm. U bënë muaj të tërë që socialistët nuk dinë se ku të drejtohen. Nuk ka një seli të mirëfilltë. Është një zyrë dikund në largësi që ekziston, por që është gjithmonë e mbyllur, zyrë në të cilën askush nuk është aty dhe njerëzit nuk dinë se ku të drejtohen. Kjo përbën një problematikë të madhe e vetë PS Shkodër.” u shpreh ajo
