Ish-drejtori i Përgjithshëm i Policisë Ahmet Prençi ka botuar për herë të parë vëllimin poetik me titull “Udhë në pasqyrë”. Në këte vëllim, Prençi i ka dedikuar një poezi edhe ish-deputetit Sokol Olldashi të ndarë nga jeta vite më parë në një aksident rrugor. Prençi ka pasur një miqësi të ngushtë me ish-ministrin e Brendshëm.
Në promovimin e librit, mes shumë artistëve, deputetëve, e miqve të ish-kryepolicit, ka qenë edhe nëna e Sokolit, Kozeta Mamaqi e cila ka marrë librin edhe me autograf nga autori dhe është përlotur nga vargjet. Një vlerësim për këtë libër e ka dhënë edhe shkrimtari Besnik Mustafaj i cili ka mbetur i surprizuar nga delli poetik i Prençit.
“Kam pasur fatin t’i lexojë në dorëshkrim dhe në libër, e akoma më shumë më kanë pëlqyer tani. Guxoj ta them me plot gojën që në këtë libër, Ahmet Prençi është poet. Kam parasysh Naim Frashërin, kryecensori i perandorisë Otomane, dhe Ahmeti kryepolici i Shqipërisë, dhe të kesh ndjeshmëri, të kesh imagjinatën që shkon kundër profesionit, ka nevojë për një fuqi shumë të madhe, ndjeshmëri të lartë e një lloj pavarësie ndaj punëve që kryen se Ahmet Prençi ka qenë prokuror, kryepolic dhe tani inspektor për kontrollin e pasurive”, thotë Mustafaj.
Por ndërkohë, Gent Strazimiri, ish-shok i Sokol Olldashit ka bere nje status disi të çuditshëm për Prençin.
“Kisha 20 vjet që e dija polic! …kishte pas qenë … POET…!”, shkruan Strazimiri.
