Thellohet edhe më tej skandali në CEZ për afera korruptive dhe pastrim parash. Këtë radhë është ish-drejtori çek i kompanisë CEZ në Shqipëri, Josef Hejsek,i cili është vënë nën hetim nga Njësia e Specializuar Task-Forcë. Ai dyshohet për mashtrim dhe pastrim parash.
Siç raporton “Gazeta Shqiptare”, Hejsek, dyshohet se në bashkëpunim me administratorin e shoqërisë “Debt International Advisory” (DIA), Kastriot Ismailaj, kanë përfituar miliona nga një skemë mashtruese për mbledhjen e borxheve të CEZ-it.
“Ka dyshime të arsyeshme se Josef Hejsek, ka përfituar në mënyrë të paligjshme dhe ka vepruar në bashkëpunim me Kastriot Ismailajn”, tha një burim për “GSH”.
Por, ndërsa Ismailaj ndodhet prapa hekurave dhe gjykata ka urdhëruar sekuestrimin e llogarive të tij bankare, Hejsek vijon ende të ketë statusin e personit nën hetim.
Deri në këto momente, ish-drejtori i CEZ-it nuk është pyetur nga Prokuroria dhe nuk ka dhënë shpjegime lidhur me dyshimet që rëndojnë mbi të.
Ndërsa Kastriot Ismailaj, prej momentit të arrestimit, nuk ka preferuar të flasë për grupin hetimor, duke kërkuar që më parë të njihet me aktet e akuzës dhe më pas të japë shpjegime.
Mësohet se në Prokurori është thirrur pak kohë më parë edhe Petrit Ahmeti, vëllai i ish-kryeministrit Vilson Ahmeti, sot kreu i ERE-s.
