Ky vit shënoi 25 vjet nga hapja e Ambasadës së Zvicrës në shtator të 1992 në Tiranë.
Në kuadër të këtij përvjetori, në Qendrën për Hapje dhe Dialog në ambientet e kryeministrisë u zhvilluan diskutime dhe përshëndetje nga diplomatë dhe qeveritarë nga të dy vendet, përgjatë tre ditëve.
Gjatë ditës së parë, Ambasadori Zvicerian në Shqipëri, Christoph Graf mbajti fjalën e tij në nder të këtij përvjetori, nga ku theksoi lidhjet e forta midis Zvicrës dhe Shqipërisë dhe progresin e shqipërisë gjatë këtyre viteve.
“Shqipëria është përfshirë në një axhendë reforme dinamike dhe është e përkushtuar për të ecur përpara. Kjo është një arsye dhe një arsye e mirë që Zvicra vazhdon të mbështesë Shqipërinë në rrugën e saj drejt integrimit evropian”, premtoi Graf.
Ndërsa dy ish diplomatë zviceranë , Christian Schmed, zëvendës shef i misionit për periudhën 1992-1997 dhe Francis Cousin, Ambasadori zviceran nga 2000-2002 ndanë kujtimet dhe përvojat e tyre duke konfirmuar përparimin e shpejtë të Shqipërisë. Gjithashtu, gjatë aktivitetit të zhvilluar u shfaqën edhe video të ndryshme, me në qendër investimet në vendin tonë nga shteti zviceran.
I pyetur nga ATSH-ja, lidhur me ndryshimet e Shqipërisë që nga 1992, ish diplomati Schmed tha se vendi ynë ka pësuar ndryshime të mëdha por që sipas tij, duhen me shumë se dy gjenerata për ti bërë të prekshme ndryshimet.
“Unë u largova nga Shqipëria në dhjetor të vitit 1997-të. Dhe nga ky moment, kam ardhur disa herë në Shqipëri për të vizituar vendet historike dhe të bukura këtu. Unë vij i organizuar me grupe për të vizituar vendet këtu. Kam vizituar Butrintin(Sarandë), Thethin, Pukën etj. Prandaj, prezenca ime sot nuk është një rikthim pas shumë vitesh, por unë kam mundur të shoh zhvillimin e Shqipërisë dhe dua të them që, kur isha këtu me mision, ndjeja që kishte “forcë” në popullin shqiptar. Shqiptarët kanë muskuj por mbi të gjitha kanë dëshirën për të bërë diçka të mirë. Një nga gabimet më të mëdha që bëhen zakonisht, lidhet me të menduarit se ndryshimi bëhet i dukshëm në një ose 2 vite. Në fakt, jo. Duhen një ose dy gjenerata për ta ndjerë këtë ndryshim, kështu që shqiptarët duhet të kenë pak durim”.
Më tej, ish diplomati vë në dukje se “Shqipëria është absolutisht në rrugë të mbarë dhe avantazhi më i madh i këtij populli është që gjeografikisht është një vend i vogel dhe me vullnet të mirë, ç’ka mund të mundësojë ndryshimet dhe Shqipëria mund të jetë një lulet e Ballkanit”.
Mesazhi i tij: Mesazhi im është një proverbë e vjetër: Shqiptarë, duhet durim në jetë”. S’duhet humbur durimi sepse ndryshimi është një proces i ngadaltë dhe jo diçka e shpejtë. Unë mendoj se Shqipëria me vullnetin dhe dëshirën e mirë është në rrugë të mbarë”, përfundoi ai. Aktivitetet e zhvilluara në ndër të marrëdhënieve diplomatike bënë bashkë në tre ditë, diplomatë, figura të njohura të skenës politike si dhe përfaqësues të medias e shoqërisë civile. /b.d
