Ish-portieri i Paris Saint-Germain, Alexandre Letellier, ka ndarë një moment të pazakontë prapa skenave me yllin brazilian Neymar. Në një intervistë për L’Equipe, Letellier tregoi se një ditë e gjeti Neymarin të ulur në tualet, me derën plotësisht të hapur, një pamje që e la pa fjalë.
“Dola menjëherë jashtë, i hutuar, dhe Abdou Diallo më pa me një shprehje mosbesimi,” rrëfeu Letellier. Sipas shpjegimit të Diallos, Neymar vuan nga klaustrofobia dhe, për këtë arsye, shmang mbylljen e derës kur ndodhet në hapësira shumë të ngushta. Ai gjithmonë lë derën hapur për të ndjerë më pak presion në hapësirë.
Alexandre Letellier luajti për PSG-në nga viti 2021 deri në vitin 2024, ku Neymar ishte shok skuadre deri në vitin 2023. Pas kësaj, Letellier kaloi një sezon te Angers para se të tërhiqej nga futbolli në tetor të këtij viti. Gjatë karrierës së tij, ai ka fituar tre kampionate franceze, dy Superkupa franceze dhe një Kupë Franceze.
