Ulja e evazionit fiskal dhe rritja e eksportit dhe e prodhimit vendor synohen nëpërmjet një sistemi të ri eksporti, i shpallur të hënën nga Dogana e Kosovës. Zyrtarët kanë listuar një numër përfitimesh të bizneseve nga ky sistem, shkruan “Koha Ditore”.
Kryeministri Isa Mustafa bashkë me kreun e Doganës, Lulzim Rafuna, kanë marrë pjesë në lansimin e këtij projekti.
Mustafa ka qenë ai që e ka aktivizuar sistemin e ri. Ai ka mundësuar të bëhet edhe dërgesa e parë e eksportit përmes këtij sistemi, e cila e ka kaluar kufirin përmes pikës doganore të Vërmicës në kufi me Shqipërinë.
Mustafa e Rafuna kanë folur në superlativ për sistemin e ri. Kanë përmendur një varg dobish të tij.